Mfano wa Karamu ya harusi

¹Yesu akajibu, akawaambia tena kwa mifano, akisema,

²Ufalme wa mbinguni unafanana na mfalme mmoja aliyemfanyia mwanawe harusi.[#Lk 14:16-24; #Yn 3:29]

³Akawatuma watumwa wake wawaite walioalikwa kuja harusini; nao wakakataa kuja.

⁴Akatuma tena watu kwa wengine, akisema, Waambieni wale walioalikwa, Tazameni, nimeandaa karamu yangu; ng'ombe zangu na vinono vimekwisha kuchinjwa, na vyote vimekuwa tayari, njoni harusini.[#Mt 21:36]

⁵Lakini hawakujali, wakaenda zao, mmoja shambani kwake, mmoja kwenye biashara yake;

⁶nao waliosalia wakawakamata watumwa wake, wakawadhulumu na kuwaua.

⁷Basi yule mfalme akaghadhibika; akatuma majeshi yake, akawaangamiza wauaji wale, akauteketeza mji wao.[#Mt 24:2]

⁸Kisha akawaambia watumwa wake, Harusi iko tayari, lakini wale walioalikwa hawakustahili.

⁹Basi Nendeni hata njia panda za barabara, na wote mwaonao waiteni harusini.[#Mt 13:47; 21:43]

¹⁰Watumwa wale wakatoka wakaenda njia kuu, wakakusanya wote waliowaona, waovu kwa wema; harusi ikajaa wageni.

¹¹Lakini alipoingia yule mfalme ili kuwatazama wageni wake, akaona mle mtu mmoja asiyevaa vazi la harusi.

¹²Akamwambia, Rafiki, uliingiaje humu nawe huna vazi la harusi? Naye akatekewa.

¹³Mfalme akawaambia watumishi, Mfungeni mikono na miguu, mchukueni mkamtupe katika giza la nje; ndiko kutakuwako kilio na kusaga meno.[#Mt 8:12; 25:30; Lk 13:28]

¹⁴Kwa maana waitwao ni wengi, bali wateule ni wachache.

Swali juu ya kulipa kodi

¹⁵Ndipo Mafarisayo wakaenda zao, wakafanya shauri, jinsi ya kumtega kwa maneno.[#Mk 12:13-17; Lk 20:20-26; #Yn 8:6]

¹⁶Wakatuma kwake wanafunzi wao pamoja na Maherodi, wakasema, Mwalimu, tunajua ya kuwa wewe u mtu wa kweli, na njia ya Mungu waifundisha katika kweli, wala hujali cheo cha mtu awaye yote, kwa maana hutazami sura za watu.[#Mk 3:6; Yn 3:2]

¹⁷Basi utuambie, Waonaje? Ni halali kumpa Kaisari kodi, ama sivyo?

¹⁸Lakini Yesu akaufahamu uovu wao, akasema, Mbona mnanijaribu, enyi wanafiki?

¹⁹Nionesheni fedha ya kodi. Nao wakamletea dinari.

²⁰Akawaambia, Ni ya nani sanamu hii, na anwani hii?

²¹Wakamwambia, Ni ya Kaisari. Akawaambia, Basi, mpeni Kaisari yaliyo ya Kaisari, na Mungu yaliyo ya Mungu.[#Rum 13:7]

²²Waliposikia, walistaajabu, wakamwacha, wakaenda zao.[#Yn 8:9]

Swali kuhusu ufufuo

²³Siku ile Masadukayo, watu wasemao ya kwamba hakuna kiyama, wakamwendea, wakamwuliza,[#Mk 12:18-27; Lk 20:27-40; #Mdo 23:8]

²⁴wakisema, Mwalimu, Musa alisema, Mtu akifa, akiwa hana watoto, ndugu yake na amwoe yule mkewe, ili ampatie nduguye mzao.[#Kum 25:5,6; Mwa 38:8]

²⁵Basi, kwetu kulikuwa na ndugu saba; wa kwanza akaoa, akafariki, na kwa kuwa hana mzao, akamwachia nduguye mke wake.

²⁶Vivyo hivyo wa pili naye, na wa tatu, hata wote saba.

²⁷Mwisho wa wote yule mwanamke akafa naye.

²⁸Basi, katika kiyama, atakuwa mke wa yupi kati ya wale saba? Maana wote walikuwa naye.

²⁹Yesu akajibu, akawaambia, Mnapotea, kwa kuwa hamyajui maandiko wala uweza wa Mungu.

³⁰Kwa maana katika kiyama hawaoi wala hawaolewi, bali huwa kama malaika mbinguni.

³¹Tena kuhusu kiyama ya wafu, hamjalisoma neno lililonenwa na Mungu, akisema,

³²Mimi ni Mungu wa Abrahamu, na Mungu wa Isaka, na Mungu wa Yakobo? Mungu si Mungu wa wafu, bali wa walio hai.[#Kut 3:6; Mt 8:11]

³³Na makutano waliposikia, walishangaa kwa mafunzo yake.

Amri iliyo kuu zaidi

³⁴Na Mafarisayo waliposikia ya kwamba amewafumba kinywa wale Masadukayo, walifanya shauri pamoja.[#Mk 12:28-31; Lk 10:25-28]

³⁵Mmoja wao, mwanasheria, akamwuliza, akimjaribu;[#Lk 10:25-28]

³⁶Mwalimu, katika torati ni amri ipi iliyo kuu?

³⁷Akamwambia, Mpende Bwana Mungu wako kwa moyo wako wote, na kwa roho yako yote, na kwa akili zako zote.[#Kum 6:5]

³⁸Hii ndiyo amri iliyo kuu, tena ni ya kwanza.

³⁹Na ya pili yafanana nayo, nayo ni hii, Mpende jirani yako kama nafsi yako.[#Law 19:18]

⁴⁰Katika amri hizi mbili hutegemea Torati yote na vitabu vya Manabii.[#Mt 7:12; Rum 13:10; Gal 5:14]

Swali kuhusu Mwana wa Daudi

⁴¹Na Mafarisayo walipokusanyika, Yesu aliwauliza, akisema, Mnaonaje kuhusu Kristo?[#Mk 12:35-37; Lk 20:41-44]

⁴²Ni mwana wa nani? Wakamwambia, Ni wa Daudi.[#Yn 7:42]

⁴³Akawauliza, Imekuwaje basi Daudi katika Roho kumwita Bwana, akisema,

⁴⁴Bwana alimwambia Bwana wangu,[#Zab 110:1; Mt 26:64]

Uketi katika mkono wangu wa kulia,

Hata niwawekapo adui zako

Kuwa chini ya miguu yako?

⁴⁵Basi, Daudi akimwita Bwana, amekuwaje ni mwanawe?

⁴⁶Wala hakuweza mtu kumjibu neno; wala hakuthubutu mtu yeyote tangu siku ile kumwuliza neno tena.