¹Afadhali maskini aendaye katika uadilifu wake,[#Mit 28:6]

Kuliko mpotovu wa midomo aliye mpumbavu.

²Tena si vizuri nafsi ya mtu ikose maarifa;[#Hos 4:6; Yn 16:3; Rum 10:2]

Naye afanyaye haraka kwa miguu hutenda dhambi.

³Upumbavu wa mtu hupotosha njia yake;[#Zab 37:7]

Na moyo wake hununa juu ya BWANA.

⁴Utajiri huongeza marafiki wengi;

Bali maskini hutengwa na rafiki yake.

⁵Shahidi wa uongo hakosi ataadhibiwa;[#Kut 23:1]

Wala asemaye uongo hataokoka.

⁶Watu wengi watamsihi mkuu ili awafadhili;

Na kila mtu ni rafiki yake atoaye zawadi.

⁷Ndugu zote wa maskini humchukia;

Jinsi gani rafiki zake huzidi kujitenga naye!

Huwafuata kwa maneno, lakini wametoweka.

⁸Apataye hekima hujipenda nafsi yake;

Ashikaye ufahamu atapata mema.

⁹Shahidi wa uongo hakosi ataadhibiwa;[#Dan 6:24]

Naye asemaye uongo ataangamia.

¹⁰Maisha ya anasa hayampasi mpumbavu;[#Mhu 10:6]

Sembuse mtumwa awatawale wakuu.

¹¹Busara ya mtu huiahirisha hasira yake;[#Mit 25:21; Mt 5:44; Rum 12:19; Efe 4:32]

Nayo ni fahari yake kusamehe makosa.

¹²Ghadhabu ya mfalme ni kama ngurumo ya simba;

Bali hisani yake kama umande juu ya majani.

¹³Mwana mpumbavu ni msiba kwa babaye;

Na ugomvi wa mke kama kudondoka kwa matone daima.

¹⁴Nyumba na mali ni urithi apatao mtu kwa babaye;[#2 Kor 12:14; Mit 18:22]

Bali mke mwenye busara, mtu hupewa na BWANA.

¹⁵Uvivu humtia mtu katika usingizi mzito;

Na nafsi yake mvivu itaona njaa.

¹⁶Yeye aihifadhiye amri huihifadhi nafsi yake;[#Lk 10:28; Rum 2:7]

Bali yeye asiyeziangalia njia zake atakufa.

¹⁷Amhurumiaye maskini humkopesha BWANA;[#Mit 14:21; Mhu 11:1; 2 Kor 9:6]

Naye atamlipa kwa tendo lake jema.

¹⁸Mrudi mwanao, kwa maana liko tumaini;

Wala usiikaze nafsi yako kwa kuangamia kwake.

¹⁹Mtu wa hasira nyingi atachukua adhabu yake,

Maana ujapomwokoa huna budi kufanya tena.

²⁰Sikiliza mashauri, ukapokee mafundisho,

Upate kuwa na hekima siku zako za mwisho.

²¹Mna hila nyingi moyoni mwa mtu;[#Mwa 37:19,20; Est 9:25; Mhu 7:29; Isa 14:26; Ebr 6:17]

Lakini shauri la BWANA ndilo litakalosimama.

²²Haja ya mwanadamu ni hisani yake;

Ni afadhali maskini kuliko mwongo.

²³Kumcha BWANA huelekea uhai;[#1 Tim 4:8]

Atakaa ameshiba; hatajiliwa na ubaya.

²⁴Mtu mvivu hutia mkono wake katika sahani;

Wala hataki hata kuupeleka kinywani pake.

²⁵Mpige mwenye mzaha, na mjinga atapata busara;

Mwonye mwenye ufahamu, naye atatambua maarifa.

²⁶Apotezaye mali za babaye na kumfukuza mamaye,

Ni mwana aaibishaye, na kuleta lawama.

²⁷Mwanangu, acha kusikia mafundisho,[#Mt 7:15; Mk 4:24; Yn 10:5; Efe 4:14; 1 Tim 4:6]

Ukitaka tu kuyaasi maneno ya maarifa.

²⁸Shahidi asiyefaa kitu hudhihaki hukumu,

Na vinywa vya wasio haki humeza uovu.

²⁹Hukumu zimewekwa tayari kwa wenye mzaha;

Na mapigo kwa mgongo wa wapumbavu.