Mungu ajua yote, aongoza yote

¹Ee Mwenyezi-Mungu, wewe umenichunguza;

wewe wanijua mpaka ndani.

²Nikiketi au nikisimama, wewe wajua;

wajua kutoka mbali kila kitu ninachofikiria.

³Watambua nikienda au nikipumzika;

wewe wazijua shughuli zangu zote.

⁴Kabla sijasema neno lolote,

wewe, ee Mwenyezi-Mungu, walijua kabisa.

⁵Uko kila upande wangu, mbele na nyuma;

waniwekea mkono wako kunilinda.

⁶Maarifa yako yapita akili yangu;

ni makuu mno, siwezi kuyaelewa.

⁷Nikimbilie wapi ambako roho yako haiko?

Niende wapi ambako wewe huko?

⁸Nikipanda juu mbinguni, wewe upo;

nikijilaza chini kuzimu, wewe upo.

⁹Nikiruka hadi mawio ya jua,

au hata mipakani mwa bahari,

¹⁰hata huko upo kuniongoza;

mkono wako wa kulia utanitegemeza.

¹¹Kama ningeliomba giza linifunike,

giza linizunguke badala ya mwanga,

¹²kwako giza si giza hata kidogo,

na usiku wangaa kama mchana;

kwako giza na mwanga ni mamoja.

¹³Wewe umeniumba, mwili wangu wote;

ulinitengeneza tumboni mwa mama yangu.

¹⁴Nakusifu maana nimefanywa kwa namna ya ajabu,

matendo yako ni ya ajabu;

wewe wanijua kabisakabisa.

¹⁵Umbo langu halikufichika kwako

nilipotungwa kwa siri na ustadi ndani ya dunia.

¹⁶Wewe uliniona hata kabla sijazaliwa,

uliandika kila kitu kitabuni mwako;

siku zangu zote ulizipanga,

hata kabla ya kuweko ile ya kwanza.

¹⁷Ee Mungu, mawazo yako ni makuu mno;

hayawezi kabisa kuhesabika.

¹⁸Ningeyahesabu yangekuwa mengi kuliko mchanga.

Niamkapo, bado nipo pamoja nawe.

¹⁹Laiti, ee Mungu, ungewaua watu waovu!

Laiti watu wauaji wangeondoka kwangu!

²⁰Wanasema vibaya juu yako;

wanasema maovu juu ya jina lako!

²¹Ee Mwenyezi-Mungu, nawachukia wanaokuchukia;

nawadharau sana wale wanaokuasi!

²²Maadui zako ni maadui zangu;

ninawachukia kabisakabisa.

²³Unichunguze, ee Mungu, unijue moyo wangu,

unipime, uyajue mawazo yangu.

²⁴Uangalie kama mwenendo wangu ni mbaya,

uniongoze katika njia ya milele.