Mchango wa kulijenga Hema Takatifu.

¹Bwana akamwambia Mose kwamba:

²Waambie wana wa Isiraeli, wanichangie vipaji vya tambiko, mtoze kila mtu, kama moyo wake unavyomtuma.[#2 Mose 35:5,22.]

³Navyo vipaji vya tambiko, mtakavyowatoza, ni hivi: dhahabu na fedha na shaba,

⁴na nguo za kifalme nyeusi na nyekundu na nguo za bafta na nywele za mbuzi,

⁵na ngozi nyekundu za madume ya kondoo na ngozi za pomboo na migunga,

⁶mafuta ya taa, manukato ya kutengeneza mafuta ya kupaka na mavukizo yanukayo vizuri;

⁷vito vya oniki na vito vingine vya kutia katika kisibau cha mtambikaji mkuu na katika kibati chake cha kifuani.

⁸Wanitengenezee Patakatifu, nipate kukaa katikati yao.

⁹Kwa mfano, mimi nitakaokuonyesha wa hilo kao na wa vyombo vyake vyote, mvifanye vyote pia, viwe vivyo hivyo.[#2 Mose 25:40.]

Sanduku la Agano.

¹⁰Tengenezeni sanduku la mbao za migunga, urefu wake uwe mikono miwili na nusu, nao upana wake uwe mkono mmoja na nusu, nao urefu wake wa kwenda juu uwe mkono mmoja na nusu.

¹¹Ulifunikize lote dhahabu tupu, upande wa ndani na wa nje uufunikize hivyo, kisha uzungushe juu yake taji la dhahabu.

¹²Tena utengeneze mapete manne kwa kuyeyusha dhahabu, uyatie penye pembe zake nne, mapete mawili upande wake mmoja, tena mapete mawili upande wake wa pili.

¹³Kisha utengeneze mipiko miwili ya migunga, nayo ifunikize dhahabu,

¹⁴kisha hiyo mipiko itie katika yale mapete pande zote mbili za sanduku, iwe ya kulichukulia hilo sanduku.

¹⁵Namo katika hayo mapete ya sanduku mipiko sharti ikae humo, isitoke humo.

¹⁶Namo sandukuni uuweke Ushahidi, nitakaokupa.[#2 Mose 25:21.]

Kiti cha Upozi.

¹⁷Kisha utengeneze kifuniko cha dhahabu tupu kuwa Kiti cha Upozi, urefu wake uwe mikono miwili na nusu, nao upana wake uwe mkono mmoja na nusu.[#Ebr. 4:16.]

¹⁸Kisha utengeneze Makerubi mawili ya dhahabu, nayo uyatengeneze kwa kuzifuafua hizo dhahabu, uyaweke pande zote mbili za mwisho wa kifuniko.

¹⁹Kerubi moja uweke upande wa mwisho wa huku, nalo la pili upande wa mwisho wa huko. Hivyo myaweke hayo Makerubi pande zake zote mbili za mwisho wa kifuniko.

²⁰Nayo Mkerubi yawe yameyakunjua mabawa juu, yakifunike hicho kifuniko kwa mabaa yao, nazo nyuso zao ziwe zimeelekeana, hayo Mkerubi yakikitazama kifuniko kwa nyuso zao.

²¹Kisha kifuniko kiweke juu ya lile sanduku, namo sandukuni uuweke Ushahidi, nitakaokupa.[#2 Mose 34:29; 1 Fal. 8:9; Ebr. 9:4.]

²²Mahali hapo ndipo, nitakapokutana na wewe, niseme na wewe nikiwa hapo juu ya hicho Kiti cha Upozi katikati ya hayo Makerubi mawili yaliyoko juu ya Sanduku la Ushahidi, nikuambie yote, nitakayokuagiza ya kuwaambia wana wa Isiraeli.

Meza ya kumwekea Bwana mikate.

²³Tena tengeneza meza kwa mbao za migunga, urefu wake uwe mikono miwili, nao upana wake uwe mkono mmoja, nao urefu wake wa kwenda juu uwe mkono mmoja na nusu.

²⁴Nayo uifunikize dhahabu tupu, kisha uzungushe juu yake taji la dhahabu.

²⁵Kisha uzungushe kando yake kibao cha kukingia chenye upana wa shibiri, nacho hicho kikingio ukizungushie taji la dhahabu.

²⁶Kisha itengenezee mapete manne ya dhahabu, nayo hayo mapete uyatie penye pembe zake nne zilizoko penye miguu yake minne.

²⁷Hayo mapete sharti yawe papo hapo chini ya kikingio, wapate kutia humo mipiko ya kuichukulia hiyo meza.

²⁸Hiyo mipiko uitengeneze nayo kwa migunga na kuifunikiza dhahabu, itumike ya kuichukulia hiyo meza.

²⁹Hata vyano vyake na vijiko vyake na vitungi vyake na vikombe vyake vinavyotumikia vinywaji vya tambiko sharti uvitengeneze kwa dhahabu tupu.

³⁰Napo hapo mezani sharti uweke pasipo kukoma mikate ya kuw usoni pangu.[#3 Mose 24:5.]

Kinara kikubwa.

³¹Tena utengeneze kinara cha dhahabu tupu! Hiki kinara na kitengenezwe kwa kufuafua dhahabu, ipate kutoka shina lake na mti wake, navyo vikombe vyake na vifundo vyake na maua yake, vyote pia viwe vimetoka katika dhahabu iyo hiyo moja.

³²Matawi sita na yatoke penye mbavu zake, matawi matatu ya kinara na yatoke penye ubavu mmoja, tena matawi matatu ya kinara na yatoke penye ubavu wa pili.

³³Vikombe vitatu vinavyofanana na maua ya mlozi viwe katika kila tawi moja, yaani vifundo pamoja na maua yao. Vivyo hivyo katika matawi yote sita yanayotoka katika mti wa kinara.

³⁴Lakini katika mti wa kinara viwe vikombe vinne vinavyofanana na maua ya mlozi, yaani vifundo pamoja na maua yao.

³⁵Tena kila mahali, matawi mawili yanapotoka katika huo mti wake, chini yake kiwe kifundo kimoja. Viwe vivyo hivyo kila mahali, matawi mawili yanapotoka. Nayo matawi yanayotoka katika kinara yawe sita.

³⁶Vifundo na matawi yao sharti yote yawe kazi moja iliyoyatokeza yote pamoja kwa kuifuafua dhahabu iyo hiyo moja, nayo yawe dhahabu tupu.

³⁷Kisha utengeneze taa zake saba, nazo hizo taa zake uziweke juu yake, zipaangaze mahala palipo mbele yake.

³⁸Nazo koleo zake na makato yake yawe ya dhahabu tupu.

³⁹Sharti ukitengeneze pamoja na hivi vyombo vyake vyote kwa kipande cha dhahabu chenye uzito wa mizigo miwili.

⁴⁰Angalia, uyafanye yote kwa mfano, niliokuonyesha mlimani![#2 Mose 26:30; Tume. 7:44; Ebr. 8:5.]