Utukufu wa ufalme wa Mungu.

¹Bwana, wewe ndiwe Mungu wangu, na nikutukuze,

na nilishukuru Jina lako, kwani umefanya mataajabu,

mashauri yako ya kale hayakugeuka, yametimia kweli.

²Kwani mji umeugeuza kuwa chungu la mawe,

mji wenye boma ukawa mabomoko,

majumba ya wageni hayafikiwi tena,

kwani mji hautajengwa kale na kale.

³Kwa hiyo watu wenye nguvu wanakutukuza,

nayo miji ya watu wa kimizimu

waliokuwa wenye ukorofi inakuogopa.

⁴Kwani umekuwa ngome ya wanyonge

na ngome ya wakiwa, waliposongeka,

ukawa kimbilio penye kimbunga na kivuli penye jua kali,

kwani kufoka kwao wakorofi ni kama kimbunga ukutani,

⁵au kama jua kali jangwani.

Makelele ya wageni ukayanyamazisha;

kama jua kali linavyoshindwa na kivuli cha wingu,

ndivyo, shangwe za wakorofi zilivyonyenyekezwa.

⁶Bwana Mwenye vikosi atayafanyia makabila yote ya watu

karamu ya manono huku mlimani,

itakuwa karamu yenye mvinyo kali

na vilaji vyenye mafuta ya kiini,

nazo mvinyo hizo zitakuwa zimechujwa.

⁷Mlimani huku atayatowesha mabuibui ya nyuso,

ni mabuibui yaliyoyafunika makabila yote ya watu,

hata mafuniko, yaliyotandwa juu ya wamizimu wote.

⁸Kufa nako atakumeza,

kutoweke kale na kale;

kisha Bwana Mungu atayafuta

machozi nyusoni pao wote,

nayo matwezo yao walio ukoo wake

atayaondoa katika nchi zote, kwani Bwana amevisema.

⁹Siku ile watasema: Mtazameni huyu!

Ndiye Mungu wetu, tuliyemngojea, atuokoe;

huyu ndiye Bwana, tuliyemngojea.

Na tushangilie! Na tuufurahie wokovu wake!

¹⁰Kwani mkono wake Bwana utatulia mlimani huku,

lakini Wamoabu watakanyagwa kwao,

kama majani makavu yanavyokanyagwa majini penye mavi.

¹¹Ijapo wapanue mikono yao mle ndani,

kama mwogeleaji anavyoipanua, apate kuogelea.

lakini kwa kuwa walijikuza, yeye atawainamisha chini

pamoja na mikono yao ihimizayo mizungu ya bure.

¹²Hata maboma yenu yenye kuta ndefu atayanyenyekeza,

akiyainamisha na kuyaangusha chini uvumbini.