Mapatilizo ya adui za Waisiraeli.

¹Karibuni, ninyi wamizimu, msikie!

Nanyi makabila ya watu, angalieni!

Nchi na isikilize nayo yote yaliyoko!

Nao ulimwengu nayo yote yachipukako!

²Kwani Bwana amewachafukia wamizimu wote,

makali yake yawatokee vikosi vyao vyote;

akawatia mwiko, wasiwepo tena, akawatoa, wachinjwe.

³Watakaouawa kwao watatupwa tu,

mnuko wa mizoga yao utaenea,

nayo milima italegezwa kwa damu zao.

⁴Hata vikosi vyote vya mbinguni vitayeyuka,

nazo mbingu zitazingwa kama kizingo cha karatasi,

vikosi vyake vyote vitanyauka,

kama majani yanavyonyauka

kwenye mizabibu nako kwenye mikuyu.

Mapatilizo ya Waedomu.

⁵Kwani upanga wangu ukilewa mbinguni,

mtauona, unavyowashukia Waedomu;

nimewatia mwiko wa kuwapo, wapatilizwe.

⁶Bwana yuko na upanga uliojaa damu, ukapakwa mafuta:

ni damu za wana kondoo na za madume,

ni mafuta ya mafigo ya madume;

kwani iko sikukuu ya tambiko ya Bwana huko Bosira,

liko chinjo kubwa katika nchi ya Edomu.

⁷Pamoja nao hata nyati wataanguka,

nayo madume na manono ya ng'ombe,

nchi yao italewa kwa kuzinywa damu zao,

nao mchanga utapata nguvu kwa mafuta yao.

⁸Kwani hiyo ni siku ya Bwana ya kulipiza,

ni mwaka wa kuvilipisha vita, walivyoupelekea Sioni.

⁹Mito yake itageuzwa kuwa lami,

nayo mavumbi yake yatakuwa viberiti,

hivyo nchi yao itakuwa lami iwakayo moto.

¹⁰Usiku na mchana hautazima,

moshi wake utapanda kale na kale;

kwa vizazi na vizazi itakuwa jangwa,

siku zote za kale na kale hapataonekana atakayepapita.

¹¹Watakaoitwaa ni korwa na nungu,

hata mabundi na makunguru watakaa huko;

Bwana atatanda juu yake kamba ya kuipimia, iwe peke yake,

ataweka nayo mawe ya kuipimia, iwe tupu kabisa.

¹²Hakuna wakuu wake watakaoiita kuwa nchi ya kifalme,

wote walioitawala watakuwa wametoweka.

¹³Miti yenye miiba itamea majumbani mwao,

namo mabomani viwawi na mangugi;

namo ndimo, watakaamo mbweha na mbuni.

¹⁴Huko vimburu watakutana na mbwa wa mwitu,

shetani atamwita shetani mwenziwe;

tena ndiko, mzuka wa kike wa usiku utakakotua

na kujipatia pa kupumzikia.

¹⁵Naye nyoka wa mamba atatengeneza kuko shimo lake,

atage mayai, apate watoto, awatunze kuvulini pake,

Tena ndiko, mwewe watakakokusanyikana,

kila mmoja na mwenziwe.

¹⁶Tafuteni katika kitabu cha Bwana, msome!

Hawa nyama hakuna hata mmoja wao asiyepatikana,

wote hakuna hata mmoja amkosaye mwenziwe;

kwani kinywa chake mwenyewe ndicho kilichowaagiza,

nayo Roho yake ndiyo inayowakusanya.

¹⁷Yeye ndiye aliyewapigia kura,

nao mkono wake ndio uliowagawia mafungu yao,

naye aliyapima kwa kamba ya kupimia,

wayatwae, yawe yao ya kale na kale,

wakae huko vizazi na vizazi.