Yeremia anawakataza Wayuda kwenda Misri.

¹Wakuu wote wa vikosi na Yohana, mwana wa Karea, na Yezania, mwana wa Hosaya, nao watu wote wa ukoo huu, wadogo kwa wakubwa, wakamjia

²mfumbuaji Yeremia, wakamwambia: Malalamiko yetu na yakuangukie, utuombee kwa Bwana Mungu wako sisi sote tuliosazwa huku! Kwani tumesalia wachache tu kwa wale wengi, kama macho yako yanavyotuona sisi.[#Yer. 37:3.]

³Bwana Mungu wako atuonyeshe njia, tutakayoishika, na jambo, tutakalolifanya.

⁴Mfumbuaji Yeremia akawaambia: Nimesikia; sasa hivi nitawaombea kwa Bwana Mungu wenu kwa ajili ya njia yenu; kila neno, Bwana atakalowajibu, nitawaambia, sitawanyima neno kamwe.

⁵Nao wakamwambia Yeremia: Bwana na awe kwetu shahidi mkweli na mtegemevu kwamba: Kila neno, Bwana Mungu wako atakalokutuma, litakavyotuambia, ndivyo, tutakavyofanya.

⁶Kama ni jema au kama ni baya, sauti ya Bwana Mungu wetu tutaisikia, kwa kuwa tunakutuma kwake, kusudi tuone mema tukiisikia sauti ya Bwana Mungu wetu.

⁷Siku kumi zilipopita, neno la Bwana likamjia Yeremia,

⁸akamwita Yohana, mwana wa Karea, nao wakuu wote wa vikosi waliokuwa naye, nao watu wote wa ukoo huu, wadogo kwa wakubwa,

⁹akawaambia: Hivi ndivyo, Bwana Mungu wa Isiraeli anavyosema, kwa kuwa mmenituma kwake, kumpelekea malalamiko yenu, yamwangukie,

¹⁰akasema: Mtakapokaa tu katika nchi hii, nitawajenga, nisiwabomoe tena, nitawapanda, nisiwang'oe tena, kwani nitageuza moyo, nisiyafanye yale mabaya, niliyowawazia.

¹¹Msimwogope mfalme wa Babeli, mnayemwogopa ninyi! Ndivyo, asemavyo Bwana: Msimwogope, kwani mimi niko pamoja nanyi, niwaokoe na kuwaponya mikononi mwake!

¹²Nami nitawapatia huruma, awahurumie na kuwarudisha katika nchi yenu.

¹³Lakini ninyi mkisema: Hatutakaa katika nchi hii, msiisikie sauti ya Bwana Mungu wenu;

¹⁴mkisema: Hivi sivyo, sharti tuende Misri, maana hatutaona huko vita, wala sauti za mabaragumu hazitasikilika huko, wala hatutaona njaa kwa kukosa chakula, kwa hiyo tunataka kukaa huko;

¹⁵basi, sasa lisikieni neno la Bwana, ninyi mlio masao ya Yuda: Hivi ndivyo, Bwana Mwenye vikosi, Mungu wa Isiraeli, anavyosema: Kama mnazielekeza nyuso zenu kwenda Misri, mkaja kukaa ugenini huko,

¹⁶ndipo, panga, ninyi mnazoziogopa, zitakapowafikia katika nchi ya Misri, nayo njaa inayowatisha itawafuata huko Misri na kugandamana nanyi, kwa hiyo ndiko, mtakakofia.

¹⁷Itakuwa hivyo: Watu wote waliozielekeza nyuso zao kwenda Misri, wakae ugenini huko, watauawa huko kwa panga na kwa njaa na kwa magonjwa mabaya; hawataona pa kuponea wala pa kuyakimbilia mabaya, mimi nitakayowaletea.[#Yer. 29:17-18.]

¹⁸Kwani hivi ndivyo, Bwana Mwenye vikosi, Mungu wa Isiraeli, anavyosema: Kama makali yangu yenye moto yalivyomwagiwa wakaao Yerusalemu, ndivyo, mtakavyomwagiwa makali yangu nanyi, mtakapokwenda Misri. Nanyi mtaapizwa kwa kustukiwa, mtazomelewa na kutukanwa, lakini mahali hapa hamtapaona tena.

¹⁹Bwana anawaambia ninyi mlio masao ya Yuda: Msiende Misri! Yajueni kabisa, ya kuwa nimewashuhudia leo!

²⁰Msiposikia mtazipoteza roho zenu, kwani ninyi wenyewe mmenituma kwa Bwana Mungu wenu kwamba: Tuombee sisi kwa Bwana Mungu wetu! Nayo yote, Bwana Mungu wetu atakayotuambia, tutayafanya vivyo hivyo, kama atakavyotujulisha.[#Yer. 42:5.]

²¹Nikawajulisha leo, lakini hamwisikii sauti ya Bwana Mungu wenu na kuyafanya yote, aliyonituma kuwaambia.

²²Kwa hiyo jueni sasa: Panga na njaa na magonjwa mabaya ndiyo yatakayowaua mahali hapo panapowapendeza kupaendea na kukaa ugenini kuko huko.