Waisiraeli wanauvuka Yordani na kupita pakavu katikati ya maji.

¹Yosua akaamka asubuhi na mapema, wakaondoka kule Sitimu, wakaja Yordani, yeye na wana wote wa Isiraeli, wakalala huko kabla ya kuvuka.[#4 Mose 25:1.]

²Siku tatu zilipopita, wenye amri wakazunguka makambini,

³wakawaagiza watu kwamba: Mtakapoliona Sanduku la Agano la Bwana Mungu wenu, watambikaji Walawi wakilichukua, nanyi mtaondoka mahali penu, mlifuate.

⁴Mtaangalia tu, hapo katikati yenu nalo hilo Sanduku pawe mahali penye urefu wa mikono elfu mbili, msilikaribie zaidi, mpate kuijua njia yenu ya kuishika, kwani hamtavuka katika njia ya siku zote.

⁵Kisha Yosua akawaambia watu: Jieueni! Kwani kesho Bwana atafanya vioja kwenu.[#2 Mose 19:10.]

⁶Kisha Yosua akawaambia watambikaji kwamba: Lichukueni Sanduku la Agano, mwatangulie watu! Ndipo, walipolichukua Sanduku la Agano, wakawatangulia watu.[#Yos. 6:6.]

⁷Ndipo, Bwana alipomwambia Yosua: Siku hii ya leo nitaanza kukukuza machoni pa Waisiraeli wote, kwa kuwa watajua, ya kama nitakuwa na wewe, kama nilivyokuwa na Mose.[#Yos. 1:5,17; 4:14.]

⁸Nawe uwaagize watambikaji wanaolichukua Sanduku la Agano kwamba: Mtakapofika ukingoni penye maji ya Yordani mtasimama.

⁹Yosua akawaambia wana wa Isiraeli: Fikeni karibu, myasikie maneno ya Bwana Mungu wenu!

¹⁰Kisha Yosua akawaambia: Hapo ndipo, mtakapojua, ya kuwa Mungu Mwenye usima yuko katikati yenu, atakapowafukuza kabisa mbele yenu Wakanaani na Wahiti na Wahiwi na Waperizi na Wagirgasi na Waamori na Wayebusi.

¹¹Nanyi mtaliona sanduku la Agano la Bwana wa nchi zote, likiwatangulia kuuvuka Yordani.

¹²Kwa hiyo jichagulieni watu kumi na wawili katika mashina ya Waisiraeli, katika kila shina moja mtu mmoja!

¹³Itakuwa hapo, nyayo za miguu ya watambikaji wanaolichukua Sanduku la Agano la Bwana wa nchi zote zitakapoyagusa maji ya Yordani, ndipo, maji ya Yordai yatakapojitenga, hayo maji yanayoshuka nayo yanayotoka juu, haya yasimame kuwa kama boma moja tu.

¹⁴Watu walipoondoka mahemani kwao, wauvuke Yordani, watambikaji wakalichukua Sanduku la Agano kuwatangulia watu;

¹⁵basi, wachukuzi wa hilo Sanduku walipofika Yordani, nayo miguu yao watambikaji waliolichukua hilo Sanduku ilipojichovya ukingoni katika maji, kwani siku zote za mavuno Yordani hujaa maji mpaka juu ukingoni pande zote mbili,

¹⁶ndipo, maji yaliyotoka upande wa juu yaliposimama, yakafurika juu kuwa kama boma moja tu, yakafika mbali sana mpaka mji wa Adamu ulioko upande wa Sartani; nayo maji yaliyoshuka kuingia katika bahari ya nyikani, ile Bahari ya Chumvi, yakapwa yote pia; kwa hiyo watu wakapata kuvuka na kuuelekea mji wa Yeriko.[#2 Mose 14:21; Sh. 114:3.]

¹⁷Nao watambikaji waliolichukua Sanduku la Agano la Bwana wakasimama katikati ya mto wa Yordani na kuishikiza miguu pakavu penyewe, nao Waisiraeli wote wakapitia pakavu; vikawa hivyo, hata watu wote wakaisha kuuvuka Yordani.