Ukoo wa Yesu Kristo.

¹Chuo cha uzao wake Yesu Kristo, mwana wa Dawidi, mwana wa Aburahamu, ni hiki:[#1 Mambo 17:11; 1 Mose 22:18.]

²Aburahamu alimzaa Isaka, Isaka akamzaa Yakobo, Yakobo akamzaa Yuda na nduguze,[#1 Mose 21:3,12; 25:26; 29:35; 49:10.]

³Yuda na Tamari wakamzaa Peresi na Zera, Peresi akamzaa Hesiromu, Hesiromu akamzaa Ramu,[#1 Mose 38:29-30.]

⁴Ramu akamzaa Aminadabu, Aminadabu akamzaa Nasoni, Nasoni akamzaa Salmoni.[#Ruti 4:18-22; 1 Mambo 3:10-19.]

⁵Salmoni na Rahabu wakamzaa Boazi, Boazi na Ruti wakamzaa Obedi, Obedi akamzaa Isai,[#Ruti 4:13-17.]

⁶Isai akamzaa mfalme Dawidi.[#2 Sam. 12:24.]

⁷Dawidi na mkewe Uria wakamzaa Salomo,[#1 Mambo 3:10-16.]

⁸Salomo akamzaa Rehabeamu, Rehabeamu akamzaa Abia, Abia akamzaa Asafu, Asafu akamzaa Yosafati, Yosafati akamzaa Yoramu, Yoramu akamzaa Uzia,

⁹Uzia akamzaa Yotamu, Yotamu akamzaa Ahazi, Ahazi akamzaa Hizikia,

¹⁰Hizikia akamzaa Manase, Manase akamzaa Amoni, Amoni akamzaa Yosia,

¹¹Yosia akamzaa Yekonia na nduguze siku zile, walipohamishwa kwenda Babeli.

¹²Walipokwisha kuhamishwa kwenda Babeli, Yekonia akamzaa Saltieli, Saltieli akamzaa Zerubabeli,[#1 Mambo 3:17; Ezr. 3:2.]

¹³Zerubabeli akamzaa Abihudi, Abihudi akamzaa Eliakimu, Eliakimu akamzaa Azoro,

¹⁴Azoro akamzaa Sadoko, Sadoko akamzaa Ahimu, Ahimu akamzaa Elihudi,

¹⁵Elihudi akamzaa Elazari, Elazari akamzaa Matani, Matani akamzaa Yakobo,

¹⁶Yakobo akamzaa Yosefu, mumewe Maria aliyekuwa mama yake Yesu aitwaye Kristo.[#Mat. 27:17,22.]

¹⁷Basi, vizazi vyote tangu Aburahamu mpaka Dawidi ni vizazi 14; tangu Dawidi mpaka kuhamishwa kwenda Babeli ni vizazi 14, tena tangu kuhamishwa kwenda Babeli mpaka Kristo ni vizazi 14.

Kuzaliwa kwake Yesu.

¹⁸Kuzaliwa kwake Yesu Kristo kulikuwa hivi: Maria, mama yake, alionekana ana mimba kwa nguvu ya Roho Mtakatifu hapo, alipokuwa ameposwa na Yosefu, nao walikuwa hawajakaribiana.[#Luk. 1:35.]

¹⁹Yosefu, mchumba wake, alikuwa mwongofu, tena hakutaka kumwumbua, kwa hiyo alitaka kumwacha tu, watu wasijue.

²⁰Alipokuwa akiyafikiri haya, mara malaika wa Bwana akamtokea katika ndoto akisema: Yosefu, mwana wa Dawidi, usiogope kumwoa Maria, Mchumba wako, kwani kitakachozaliwa naye ni cha Roho Mtakatifu.[#Mat. 1:18.]

²¹Atazaa mtoto mwanamume, naye utamwita jina lake Yesu. Kwani yeye ndiye atakayewaokoa watu wake katika makosa yao.[#Luk. 1:31; 2:21; Tume. 4:12; Sh. 130:8.]

²²Haya yote yalifanyika, lipate kutimia lililonenwa na Bwana kwa mfumbuaji:[#Yes. 7:14.]

²³Tazama, mwanamwali atapata mimba, atazaa mtoto

mwanamume, nalo jina lake watamwita Imanueli, ni kwamba:

Mungu yuko nasi.*

²⁴Yosefu alipoamka katika usingizi akatenda, kama malaika wa Bwana alivyomwagiza. Akamwoa mchumba wake,

²⁵lakini hakumkaribia, mpaka alipomzaa mwanawe wa kwanza. Akamwita jina lake YESU.[#Luk. 2:7.]