Mtu asilewe, wala asifanye matata!

¹Mvinyo ni mfyozaji, nacho kileo huleta makelele,

kila atokaye hapo na kupepesuka hakuerevuka.

²Tisho la mfalme ni ngurumo ya simba,

amkasirishaye hujikosea mwenyewe.

³Mtu ajitengaye penye ugomvi huheshimiwa,

lakini kila mjinga hukenua meno.

⁴Mvivu hataki kulima tangu hapo, kipupwe kinapoanza,

tena akitafuta vilaji mavunoni, haviko.

⁵Maji yenye lindi ni mashauri yaliyomo noyoni mwa mtu,

lakini mtu mtambuzi hujua kuyateka.

⁶Watu wengi hutangaza, ila mtu akizikuza huruma zake yeye,

lakini aonaye mtu mwenye welekevu wa kweli yuko nani?

⁷Aishikaye njia yake pasipo kukosa ni mwongofu,

wanawe wamfuatao nyuma ndio wenye shangwe.

⁸Mfalme akaaye katika kiti chake cha kukatia mashauri

huyatawanya kwa macho yake mabaya yote.

⁹Yuko nani awezaye kusema: Nimeung'aza moyo wangu?

Nimetakata, makosa yangu yamekwisha kuondoka?

¹⁰Vipimo vya namna mbili na pishi za namna mbili,

zote mbili humtapisha Bwana.

¹¹Hata kijana hujulika kwa matendo yake,

kama kazi zake zinatakata, kama zinakwenda sawa.

¹²Sikio lisikialo na jicho lionalo,

Bwana ndiye ayatengenezaye yote mawili.

¹³Usiupende usingizi, usije kuwa mkosefu!

Yafumbue macho yako! Ndipo, utakaposhiba chakula.

¹⁴Mnunuzi husema: Ni kibaya, ni kibaya,

lakini akiisha kwenda zake hujichekea.

¹⁵Ingawa dhahabu ni lulu ziwe nyingi,

lakini kiko kitu kizipitacho, ndio midomo yenye ujuzi.

¹⁶Zichukue nguo zake yeye aliyejitoa kuwa dhamana ya mwingine,

kwa ajili yao walio wageni mnyang'anye yeye mali zake.

¹⁷Vilaji vilivyopatwa kwa udanganyifu mtu huviona kuwa vitamu,

lakini mwisho kinywa chake hujaa vijiwe vya changarawe.

¹⁸Mawazo yaliyopigiwa mashauri mema hufanikiwa,

ukipiga vita vipige na kuzitumia akili!

¹⁹Atembeaye na kusingizia hufunua mashauri ya njama,

naye afumbuaye midomo usifanye bia naye.

²⁰Amwapizaye baba yake na mama yake,

taa yake huzimika katika giza lizidishalo.

²¹Ukianza kujipatia fungu la mali kwa kupokonya upesiupesi,

mwisho hazibarikiwi.

²²Usiseme: Na nilipishe mabaya!

Ila mngojee Bwana! Ndiye atakayekusaidia.

²³Vipimo viwili humtapisha Bwana,

nayo mizani ya kudanganyia haifai.

²⁴Bwana ndiye anayeiendesha miguu ya mtu,

maana mtu anawezaje kuitambua njia yake?

²⁵Mtu hujinasa kwa kujisemea tu: Hii mali ya Bwana,

na kuyafikiri halafu, aliyoyaapa.

²⁶Mfalme mwerevu wa kweli huwapepeta wasiomcha Mungu,

akipitisha juu yao gari la kupuria.

²⁷Roho ya mtu ni taa, aliyopewa na Bwana,

nayo huyachunguza yote yaliyomo tumboni.

²⁸Upole na welekevu humlinda mfalme,

naye hukishikiza kiti chake cha kifalme kwa upole.

²⁹Utukufu wa vijana ni nguvu zao,

nao urembo wa wazee ni mvi.

³⁰Mavilio yenye vidonda humtakasa mtu, mabaya yamtoke,

ijapo mapigo yaingie mpaka tumboni ndani.