Mungu huiongoza mioyo ya watu.

¹Moyo wa mfalme ni kama vijito vya maji mkononi mwa Bwana,

humpeleka pote panapompendeza.

²Njia zote za mtu hunyoka machoni pake,

lakini Bwana huijaribu mioyo.

³Kufanya wongofu na kupiga mashauri yaliyo sawa

humpendeza Bwana kuliko kutoa vipaji vya tambiko.

⁴Macho yajivunayo na moyo ujitutumuao

ndio taa zao wasiomcha Mungu, nazo hukosesha.

⁵Mawazo yake ajikazaye kufanya kazi humpatia mengi,

lakini mwenye haraka hujipatia ukosefu tu.

⁶Kujipatia malimbiko kwa ulimi uongopao

ni kama pumzi ipoteleayo angani tu,

wayatakao hujitafutia kufa.

⁷Uangamizi wao wasiomcha Mungu huwapokonya,

kwa kuwa hukataa kufanya yaliyo sawa.

⁸Njia ya mtu akoraye manza hupotoka sana,

lakini matendo yake anyokaye hutakata.

⁹Kukaa darini pembeni ni kwema

kuliko kukaa na mwanamke mgomvi katika nyumba moja.

¹⁰Roho yake asiyemcha Mungu hutamani mabaya,

mwenziwe hapati huruma machoni pake.

¹¹Mfyozaji akitozwa fedha, mjinga huerevuka,

naye mwerevu wa kweli akifundishwa hupata ujuzi zaidi.

¹²Yuko mwongofu aiangaliaye nyumba yake asiyemcha Mungu,

naye huwapotoa wasiomcha Mungu, wapatwe na mabaya.

¹³Alizibaye sikio lake, lisisikie kilio cha mnyonge,

naye atakapolia hatajibiwa.

¹⁴Kipaji kipenyezwacho hutuliza ukali,

nayo matunzo yafichwayo penye kujua huzima nao moto mkali.

¹⁵Furaha ya mwongofu ni kufanya yaliyo sawa,

lakini wafanyao mapotovu hukuwazia kuwa mwangamizo.

¹⁶Mtu apoteaye kwa kuiacha njia ya ujuzi

hupata kupumzika katika mkutano wao waliokufa.

¹⁷Apendaye michezochezo huwa mtu akosaye vyote,

apendaye mvinyo na vinono hatapata mali.

¹⁸Asiyemcha Mungu hana budi kumkomboa mwongofu,

naye avunjaye agano hulipa mahali pao wanyokao.

¹⁹Kukaa katika nchi ya nyika ni kwema

kuliko kukaa na mwanamke mgomvi mwenye matata.

²⁰Limbiko lipendezalo na mafuta yamo katika makao ya werevu wa kweli,

lakini mtu mjinga huyameza.

²¹Afanyaye bidii kuufuata wongofu na upole

hupata uzima na wongofu na utukufu.

²²Mwongofu hupanda na kuuingia mji wa wenye nguvu,

nalo boma lao gumu, walilolitegemea, huliangusha.

²³Akiangaliaye kinywa chake na ulimi wake

hujiangalia mwenyewe, asisongwe na maneno.

²⁴Mtu ajitutumuaye kwa majivuno, aitwaye mfyozaji

hufanya mambo, anayofundishwa na majivuno yake yafurikayo.

²⁵Tamaa za mvivu humwua,

kwa kuwa mikono yake hukataa kufanya kazi.

²⁶Kila siku yako yanayotamaniwa kwa tamaa,

lakini mwongofu hutoa mali, hawanyimi wamwombao.

²⁷Wasiomcha Mungu wakitoa vipaji vya tambiko humtapisha,

zaidi wakivitoa na kuyaficha mawazo yao mabaya.

²⁸Shahidi ya uwongo huangamia,

lakini mtu asikiaye kwanza atasema siku zote.

²⁹Mtu asiyemcha Mungu huushupaza uso wake,

lakini yeye anyokaye huishupaza njia yake.

³⁰Hakuna werevu wa kweli, wala utambuzi,

wala shauri njema mbele ya Bwana.

³¹Farasi huwekwa kuwa tayari siku za mapigano,

lakini wokovu hutoka kwa Bwana.