Msijitoe kuwa dhamana!

¹Mwanangu, kama umejitoa kuwa dhamana ya mwenzio,

ukampa mwingine mkono wako,

²kama umejifunga kwa maneno ya kinywa chako,

ukanaswa na maneno ya kinywa chako,

³basi, mwanangu, fanya hivi, upate kujiokoa,

kwa kuwa umejitia mkononi mwa mwenzio:

nenda kumwangukia mwenzio na kumlalamikia!

⁴Usiache, macho yako yalale usingizi,

wala kope zako zisinzie!

⁵Ponyoka mkononi mwake kama paa,

au kama ndege anavyoponyoka mkononi mwa mtega tanzi!

Msiwe wavivu!

⁶Nenda kwao siafu, wewe mvivu,

uzitazame njia zao, uerevuke kweli!

⁷Hao hawana mkuu wala msimamizi,

wala mtawalaji hawana.

⁸Hujitengenezea pamba za siku za vuli,

hulimbika vyakula penye siku za mavuno yao.

⁹Wewe mvivu, unataka kulala mpaka lini?

utaamka lini katika usingizi wako?

¹⁰Unataka kulala bado kidogo na kupumzika bado kidogo

na kukunja mikono kitandani bado kidogo.

¹¹Kisha umaskini utakujia kama mpiga mbio

pamoja na ukosefu ulio kama mtu aliyevaa mata.

Msifanye mabaya!

¹²Mtu asiyefaa kitu, mtu mwenye maovu

ndiye atembeaye mwenye upotovu wa kinywa.

¹³Hukonyeza kwa macho yake, huparapara kwa miguu yake,

tena hupungia watu kwa vidole vyake.

¹⁴Huwaza mapotovu moyoni mwake akitunga mabaya pasipo kukoma,

huchokoza, agombanishe watu.

¹⁵Kwa hiyo mara mwangamizo wake utamjia,

asipoviwazia atavunjwa, asione atakayemponya.

¹⁶Yako mambo sita yamchukizayo Bwana,

tena yako mambo saba yauchafuaye moyo wake:

¹⁷macho yenye majivuno, ulimi wenye uwongo,

mikono imwagayo damu ya mtu asiyekosa,

¹⁸moyo utungao maneno maovu,

miguu ipigayo mbio kukimbilia penye mabaya,

¹⁹shahidi ya uwongo asemaye ya kuongopa

naye achokozaye, agombanishe ndugu.

Msizini!

²⁰Mwanangu, lilinde agizo la baba yako,

wala usiyabeue maonyo ya mama yako!

²¹Yafunge siku zote moyoni mwako,

kayavae shingoni pako!

²²Ukitembea, na yakuongoze! Ukilala na yakulinde,

ukiamka, na yaongee na wewe!

²³Kwani hilo agizo ni taa, hayo maonyo nayo ni mwanga,

ni njia ya kwenda uzimani, ukionyeka kwa kukanywa nayo.

²⁴Yakuangalie, usitazame mwanamke mbaya,

wala usiyasikilize maneno yatelezayo ya mwanamke mgeni!

²⁵Usiutamani uzuri wake moyoni mwako!

wala asikunase na kukukonyeza kwa kope za macho yake!

²⁶Kwani kwa ajili ya mwanamke mgoni mtu hutoa mali,

mpaka akose hata kipande cha mkate;

naye mwanamke wa mwingine huotea,

mpaka aipate nayo roho ya mtu isiyolipika.

²⁷Je? Mtu anaweza kupaa moto, auweke kifuani pake

pasipo kuzichoma nguo zake?

²⁸Au mtu anaweza kukanyaga makaa yenye moto,

nyayo zake siziungue?

²⁹Ndivyo, mtu alivyo akiingia kwa mke wa mwenziwe,

kwao wote wamgusao hakuna atokaye pasipo kukora manza.

³⁰Watu hawambezi mwizi aibiaye kujishibisha tu,

kama alikuwa na njaa.

³¹Akikamatwa hulipa mara saba,

ijapo atoe mali zote, alizo nazo nyumbani.

³²Mtu akivunja unyumba na mke wa mwingine amepotelewa na akili,

maana hujiangamiza mwenyewe kwa kufanya hivyo.

³³Hupata mapigo na matusi,

wala hakuna awezaye kuyafuta yaliyomtia soni.

³⁴Kwani wivu ni kama moto wa mtu wa kiume,

haoni huruma anapojilipiza.

³⁵Hatazami kabisa makombozi yo yote,

ingawa mtolee matunzo mengi, hayataki.