Sheria au imani

¹Enyi Wagalatia msio na akili, ni nani aliyewaloga, ninyi ambao Yesu Kristo aliwekwa wazi mbele ya macho yenu ya kuwa amesulubiwa?

²Nataka kujifunza neno hili moja kwenu. Je! Mlipokea Roho kwa matendo ya sheria, au kwa kusikia kunakotokana na imani?

³Je! Mmekuwa wajinga namna hii? Baada ya kuanza katika Roho, mnataka kukamilishwa sasa katika mwili?

⁴Mmepatikana na mateso makubwa namna hii bure? Ikiwa ni bure kweli.

⁵Basi, yeye awapaye Roho na kufanya miujiza kati yenu, je! Afanya hayo kwa matendo ya sheria, au kwa kusikia kunakotokana na imani?

⁶Kama vile Abrahamu alivyomwamini Mungu akahesabiwa haki.[#Mwa 15:6; Rum 4:3]

⁷Fahamuni basi, ya kuwa wale walio wa imani, hao ndio wana wa Abrahamu.[#Rum 4:16]

⁸Na andiko, kwa vile lilivyoona tangu zamani kwamba Mungu atawahesabia haki Mataifa kwa imani, lilimhubiria Abrahamu Habari Njema zamani, kusema, Katika wewe Mataifa yote watabarikiwa.[#Mwa 12:3; 18:18; Mdo 3:25]

⁹Basi hao walio wa imani hubarikiwa pamoja na Abrahamu aliyekuwa mwenye imani.[#Rum 4:16]

¹⁰Kwa maana wale wote walio wa matendo ya sheria, wako chini ya laana; maana imeandikwa, Amelaaniwa kila mtu asiyedumu katika yote yaliyoandikwa katika kitabu cha Torati, ayafanye.[#Kum 27:26]

¹¹Ni dhahiri ya kwamba hakuna mtu ahesabiwaye haki mbele za Mungu katika sheria; kwa sababu Mwenye haki ataishi kwa imani.[#Hab 2:4; Rum 1:17; Ebr 10:38]

¹²Na torati haikuja kwa imani, bali, Ayatendaye hayo ataishi katika hayo.[#Law 18:5; Rum 10:5]

¹³Kristo alitukomboa katika laana ya torati, kwa kuwa alifanywa laana kwa ajili yetu; maana imeandikwa, Amelaaniwa kila mtu aangikwaye juu ya mti;[#Kum 21:23; Rum 8:3; 2 Kor 5:21]

¹⁴ili kwamba baraka ya Abrahamu iwafikie Mataifa katika Yesu Kristo, tupate kupokea ahadi ya Roho kwa njia ya imani.

Ahadi kwa Abrahamu

¹⁵Ndugu zangu, nanena kwa jinsi ya kibinadamu. Lijapokuwa ni agano la mwanadamu, hata hivyo likiisha kuthibitika, hakuna mtu alibatilishaye, wala kuliongeza neno.

¹⁶Basi ahadi zilinenwa kwa Abrahamu na kwa mzao wake. Hasemi, Kwa wazawa, kana kwamba ni wengi, bali kana kwamba ni mmoja, Kwa mzao wako, yaani, Kristo.[#Mwa 12:7; 13:15; 17:7; 22:18; 24:7]

¹⁷Nisemalo ni hili; agano lililothibitishwa kwanza na Mungu, torati iliyotokea miaka mia nne na thelathini baadaye hailitangui, hata kuibatilisha ile ahadi.[#Kut 12:40]

¹⁸Kwa maana urithi ukiwa kwa sheria, hauwi tena kwa ahadi; lakini Mungu alimkirimia Abrahamu kwa njia ya ahadi.[#Rum 4:14; 11:6]

Kusudi ya Torati

¹⁹Torati ni nini basi? Iliingizwa kwa sababu ya makosa, hadi aje huyo mzao aliyepewa ile ahadi; iliamriwa kwa utumishi wa malaika kwa mkono wa mjumbe.[#Rum 5:20; Ebr 2:2; Mdo 7:38,53]

²⁰Basi aliye mjumbe si mjumbe wa mmoja; bali Mungu ni mmoja.

²¹Basi je! Torati haipatani na ahadi za Mungu? La hasha! Kwa kuwa, kama ingalitolewa sheria iwezayo kuhuisha, hakika haki ingalipatikana kwa sheria.[#Rum 8:2-4]

²²Lakini andiko limeyafunga yote chini ya nguvu ya dhambi, makusudi hao waaminio wapewe ile ahadi kwa imani ya Yesu Kristo.[#Rum 3:9-19; 11:32]

²³Lakini kabla ya kuja ile imani tulikuwa tumewekwa chini ya sheria, tumefungwa mpaka ije ile imani itakayofunuliwa.[#Gal 4:3; 1 Pet 1:5]

²⁴Hivyo torati imekuwa kiongozi kutuleta kwa Kristo, ili tuhesabiwe haki kwa imani.

²⁵Lakini, iwapo imani imekuja, hatupo tena chini ya kiongozi.[#Rum 10:4]

²⁶Kwa kuwa ninyi nyote mmekuwa wana wa Mungu kwa njia ya imani katika Kristo Yesu.[#Yn 1:12; Rum 8:17]

²⁷Maana ninyi nyote mliobatizwa katika Kristo mmemvaa Kristo.[#Rum 6:3; 13:14]

²⁸Hakuna Myahudi wala Mgiriki. Hakuna mtumwa wala huru. Hakuna mwanamume wala mwanamke. Maana ninyi nyote mmekuwa wamoja katika Kristo Yesu.[#Rum 10:12; 1 Kor 12:13]

²⁹Na kama ninyi ni wa Kristo, basi, mmekuwa uzao wa Abrahamu, na warithi kulingana na ahadi.[#Rum 4:13; 9:7]