Nayachukia maisha yangu

¹Nayachukia maisha yangu;

Nitayasema malalamiko yangu wazi;

Nitanena kwa uchungu wa roho yangu.

²Nitamwambia Mungu, Usinihukumie makosa;

Nijulishe kwa nini unapingana nami.

³Je! Ni vema kwako wewe kuonea,

Na kuidharau kazi ya mikono yako,

Na kuiunga mkono mipango ya waovu?

⁴Je! Wewe una macho ya kimwili,[#1 Sam 16:7; Lk 16:15; Ufu 1:14]

Au je! Waona kama aonavyo binadamu?

⁵Je! Siku zako ni kama siku za mtu,

Au je! Miaka yako ni kama miaka ya mtu,

⁶Hata ukaulizauliza habari za uovu wangu,

Na kuitafuta dhambi yangu,

⁷Ujapojua ya kuwa mimi si mwovu;

Wala hapana awezaye kuokoa kutoka kwa mkono wako?

⁸Mikono yako imeniumba na kunifinyanga;[#Zab 119:73; Isa 43:7]

Nawe utageuka na kuniangamiza?

⁹Kumbuka, nakusihi ulivyonifinyanga kama vile udongo;[#Mwa 2:7; Isa 45:9]

Nawe, je! Utanirudisha uvumbini tena?

¹⁰Je! Wewe hukunimimina kama maziwa,[#Zab 139:14]

Na kunigandisha mfano wa jibini?

¹¹Umenivika ngozi na nyama,

Na kuniunga pamoja kwa mifupa na mishipa.

¹²Unanijalia uhai na fadhili,

Na kwa uangalifu wako roho yangu imetunzwa.

¹³Lakini mambo haya uliyaficha moyoni mwako;

Najua kuwa haya yamo nafsini mwako;

¹⁴Nikifanya dhambi, ndipo waniangalia,

Wala hutaniachilia na uovu wangu.

¹⁵Mimi nikiwa mwovu, ole wangu![#Zab 9:17; Isa 3:11; Mal 3:18; Ayu 9:12; Kut 3:7; Zab 25:18; Omb 1:20]

Nami nikiwa mwenye haki, walakini sitainua kichwa changu;

Maana nimejaa aibu

Nikiyaangalia mateso yangu.

¹⁶Kichwa changu kikijiinua, waniwinda kama simba;[#Isa 38:13; Omb 3:10]

Tena wajionesha kwangu kuwa wa ajabu.

¹⁷Wewe unafanya upya ushahidi wako juu yangu,

Na kuongeza kisirani chako juu yangu;

Ukileta jeshi baada ya jeshi juu yangu.

¹⁸Kwa nini basi kunitoa tumboni?

Ningekata roho, lisinione jicho lolote.

¹⁹Ningalikuwa kama mtu asiyekuwapo;

Ningalichukuliwa kaburini kutoka tumboni.

²⁰Je! Siku zangu si chache? Acha basi,[#Zab 39:13; Ayu 7:16]

Usinisumbue, nipate angaa kutulizwa moyo kidogo.

²¹Kabla sijaenda huko ambako sitarudi kutoka huko tena,[#Ayu 3:5; Zab 88:12; 23:4]

Ni hiyo nchi ya giza, giza tupu;

²²Ni nchi ya giza kuu, kama giza lenyewe lilivyo;

Ni nchi ya giza tupu, isiyo na mpango wowote wa mambo,

Nchi ambayo nuru yake ni kama giza.