Taa isiyozimika

¹Kisha BWANA akanena na Musa, na kumwambia,

²Waagize wana wa Israeli wakuletee mafuta ya zeituni safi ya kupondwa kwa ajili ya ile nuru, ili hiyo taa iwake daima.[#Kut 27:20; 39:37; Hes 8:2-4]

³Hapo nje ya pazia la ushahidi, ndani ya hema ya kukutania, Haruni ataitengeneza tangu jioni hadi asubuhi mbele za BWANA daima; ni amri ya milele katika vizazi vyenu.

⁴Atazitengeneza hizo taa katika kile kinara kilicho safi mbele za BWANA daima.[#Kut 31:8; 37:17-24]

Mikate ya Hema Takatifu

⁵Nawe utatwaa unga mwembamba, na kuoka mikate kumi na miwili ya huo unga; sehemu za kumi mbili za efa, zitakuwa katika mkate mmoja.[#Kut 25:30; 40:24]

⁶Nawe iweke mistari miwili, mikate sita kwa kila mstari, juu ya hiyo meza safi, mbele za BWANA.[#1 Fal 7:48; 2 Nya 4:19; Ebr 9:2]

⁷Nawe utatia ubani safi juu ya kila mstari, ili uwe ukumbusho kwa hiyo mikate, sadaka ya kusongezwa kwa BWANA kwa moto.

⁸Kila siku ya Sabato ataipanga mbele za BWANA daima; ni kwa ajili ya wana wa Israeli, agano la milele.[#Hes 4:7; 1 Nya 9:32; 2 Nya 2:4]

⁹Nayo itakuwa ya Haruni na wanawe; nao wataila katika mahali patakatifu; kwa sababu kwake ni takatifu sana katika sadaka zitolewazo kwa BWANA kwa moto, kwa amri ya milele.[#Mt 12:4; Mk 2:26; Lk 6:4; 1 Sam 21:6; Kut 29:33; Law 8:3; 21:22]

Kufuru na adhabu yake

¹⁰Ikawa mwanamume mmoja ambaye mama yake ni Mwisraeli, na babaye ni Mmisri, alitokea kati ya wana wa Israeli akalikufuru; na kupigana na Mwisraeli katika kambi;

¹¹kisha huyo mwanamume ambaye mama ni Mwisraeli akakufuru jina la Bwana na kulaani nao watu wakampeleka kwa Musa. Mama yake mtu huyo alikuwa akiitwa Shelomithi, binti ya Dibri, wa kabila la Dani.[#Ayu 1:5; 2:5,9; Isa 8:21; Kut 18:22]

¹²Nao wakamtia kifungoni, ili wapate kuambiwa neno litakalotoka kinywani pa BWANA.[#Hes 15:34; Kut 18:15,16]

¹³Na BWANA akasema na Musa, na kumwambia,

¹⁴Mtoe huyo aliyelaani nje ya kambi; na wale wote waliomsikia na waweke mikono yao kichwani mwake, kisha mkutano wote na wamwue kwa kumpiga kwa mawe.[#Kum 17:7]

¹⁵Nawe nena na wana wa Israeli na kuwaambia, Mtu yeyote atakayemlaani Mungu wake atachukua dhambi yake.[#Law 5:1; 9:13]

¹⁶Na yeyote atakayelaani jina la BWANA hakika atauawa; mkutano wote watamwua kwa kumpiga kwa mawe; kama ni mgeni, kama ni mzaliwa, hapo atakapolaani jina la BWANA atauawa.[#1 Fal 21:10; Zab 74:10,18; Mt 12:31; Mk 3:28; Yak 2:7]

¹⁷Na mtu ampigaye mtu hadi akafa, lazima atauawa;[#Kut 21:12; Mwa 9:6; Hes 35:31; Kum 19:11; Mt 26:52; Ufu 13:10]

¹⁸na atakayempiga mnyama hadi akafa atalipa; uhai kwa uhai.

¹⁹Na mtu akimtia mwenziwe kilema; vile vile kama alivyofanya, naye atafanyiwa vivyo hivyo;[#Kut 21:24; Kum 19:21; Mt 5:38; 7:2]

²⁰jeraha kwa jeraha, jicho kwa jicho, jino kwa jino; vile vile kama alivyomtia mtu kilema, naye atalipwa vivyo hivyo.[#Kut 21:23-25; Kum 19:21; Mt 5:38]

²¹Na mtu amwuaye mnyama atalipa; na yeye atakayemwua binadamu atauawa.[#Kut 21:33]

²²Mtakuwa na sheria moja tu, kwa huyo aliye mgeni, na kwa mzalia; kwa kuwa mimi ndimi BWANA, Mungu wenu.[#Hes 15:16; Kut 12:49; Law 19:34; Kum 10:17,19]

²³Musa akanena na wana wa Israeli, nao wakamtoa huyo aliyeapiza nje ya kambi, wakamwua kwa kumpiga kwa mawe. Wana wa Israeli wakafanya kama BWANA alivyomwagiza Musa.[#Kum 13:9; 17:7]