Mfano wa mpanzi

¹Siku ile Yesu akatoka nyumbani, akaketi kando ya bahari.[#Mk 4:1-20; Lk 8:4-15]

²Wakamkusanyikia makutano mengi, hata akapanda katika mashua, akaketi; na ule mkutano wote wakasimama pwani.[#Lk 5:1-3]

³Akawaambia mambo mengi kwa mifano, akisema, Tazama, mpanzi alitoka kwenda kupanda.

⁴Na alipokuwa akipanda, mbegu nyingine zilianguka karibu na njia, ndege wakaja wakazila;

⁵nyingine zikaanguka penye miamba, pasipokuwa na udongo mwingi; zikaota haraka, kwa kukosa udongo wenye kina;

⁶Lakini jua lilipozuka ziliungua; na kwa kuwa hazina mizizi zikanyauka.

⁷Nyingine zikaanguka penye miiba; ile miiba ikamea, ikazisonga;

⁸nyingine zikaanguka penye udongo mzuri, zikazaa, moja mia, moja sitini, moja thelathini.

⁹Mwenye masikio na asikie.

Sababu ya kusema kwa mifano

¹⁰Wakaja wanafunzi, wakamwambia, Kwa nini wasema nao kwa mifano?

¹¹Akajibu, akawaambia, Ninyi mmejaliwa kuzijua siri za ufalme wa mbinguni, bali wao hawakujaliwa.

¹²Kwa maana yeyote mwenye kitu atapewa, naye atazidishiwa tele; lakini yeyote asiye na kitu, hata kile alicho nacho atanyang'anywa.[#Mt 25:29; Mk 4:25; Lk 8:18; 19:26]

¹³Kwa sababu hii nasema nao kwa mifano; kwa kuwa wakitazama hawaoni, na wakisikia hawasikii, wala kuelewa.[#Kum 29:4]

¹⁴Na neno la nabii Isaya linatimia kwao, likisema,[#Isa 6:9-10; Yn 12:40; Mdo 28:26,27]

Kusikia mtasikia, wala hamtaelewa;

Kutazama mtatazama, wala hamtaona.

¹⁵Maana mioyo ya watu hawa imekuwa mizito,

Na kwa masikio yao hawasikii vema,

Na macho yao wameyafumba;

Wasije wakaona kwa macho yao,

Wakasikia kwa masikio yao,

Wakaelewa kwa mioyo yao,

Wakaongoka, nikawaponya.

¹⁶Lakini, heri macho yenu, kwa kuwa yanaona; na masikio yenu, kwa kuwa yanasikia.[#Lk 10:23-24]

¹⁷Kwa maana, amin, nawaambia, Manabii wengi na wenye haki walitamani kuyaona mnayoyaona ninyi, wasiyaone; na kuyasikia mnayoyasikia ninyi, wasiyasikie.

Maelezo ya mfano wa mpanzi

¹⁸Basi ninyi sikilizeni mfano wa mpanzi.

¹⁹Kila mtu alisikiapo neno la ufalme bila kulielewa, huja yule mwovu, akalinyakua lililopandwa moyoni mwake. Huyo ndiye aliyepandwa karibu na njia.

²⁰Naye aliyepandwa penye miamba, huyo ndiye alisikiaye lile neno, akalipokea mara kwa furaha;

²¹lakini hana mizizi ndani yake, bali hudumu kwa muda; ikitukia dhiki au udhia kwa ajili ya lile neno, mara huchukizwa.

²²Naye aliyepandwa penye miiba, huyo ndiye alisikiaye lile neno; na shughuli za dunia, na udanganyifu wa mali hulisonga lile neno; likawa halizai.[#Mt 6:19-34; 1 Tim 6:9]

²³Naye aliyepandwa penye udongo mzuri, huyo ndiye alisikiaye lile neno, na kulielewa; yeye ndiye azaaye matunda, huyu mia, na huyu sitini, na huyu thelathini.

Mfano wa magugu katikati ya ngano

²⁴Akawatolea mfano mwingine, akisema, Ufalme wa mbinguni umefanana na mtu aliyepanda mbegu njema katika shamba lake;[#Mt 13:36-43]

²⁵lakini watu walipolala, akaja adui yake akapanda magugu katikati ya ngano, akaenda zake.

²⁶Baadaye majani ya ngano yalipomea na kuzaa, yakaonekana na magugu.

²⁷Watumwa wa mwenye nyumba wakaenda wakamwambia, Bwana, hukupanda mbegu njema katika shamba lako? Limepata wapi basi magugu?

²⁸Akawaambia, Adui ndiye aliyetenda hivi. Watumwa wakamwambia, Basi, wataka twende tukayakusanye?

²⁹Akasema, La; msije mkakusanya magugu, na kuzing'oa ngano pamoja nayo.

³⁰Viacheni vyote vikue hadi wakati wa mavuno; na wakati wa mavuno nitawaambia wavunao, Yakusanyeni kwanza magugu, myafunge matita matita mkayachome; bali ngano ikusanyeni mkaiweke ghalani mwangu.[#Mt 3:12]

Mfano wa punje ya haradali

³¹Akawatolea mfano mwingine, akisema, Ufalme wa mbinguni umefanana na punje ya haradali, aliyoitwaa mtu akaipanda katika shamba lake;[#Mk 4:30-32; Lk 13:18,19]

³²nayo ni ndogo kuliko mbegu zote; lakini ikiisha kumea, huwa kubwa kuliko miboga yote ikawa mti, hata ndege wa angani huja na kukaa katika matawi yake.[#Dan 4:12,21; Eze 17:23; 31:6; Zab 104:12]

Mfano wa chachu

³³Akawaambia mfano mwingine; Ufalme wa mbinguni umefanana na chachu aliyoitwaa mwanamke, akaisitiri ndani ya pishi tatu za unga, hata ukachachwa wote pia.[#Lk 13:20,21]

Matumizi ya mifano

³⁴Hayo yote Yesu aliwaambia makutano kwa mifano; wala pasipo mfano hakuwaambia neno;[#Mk 4:33,34]

³⁵ili litimie neno lililonenwa na nabii, akisema,[#Zab 78:2]

Nitafumbua kinywa changu kwa mifano,

Nitayatamka yaliyositirika tangu kuumbwa kwa ulimwengu.

Yesu aelezea mfano wa magugu

³⁶Kisha Yesu akawaaga makutano, akaingia katika nyumba; wanafunzi wake wakamwendea, wakasema, Tufafanulie mfano wa magugu ya shambani.[#Mt 13:24-30]

³⁷Akajibu, akasema, Azipandaye zile mbegu njema ni Mwana wa Adamu;

³⁸lile shamba ni ulimwengu; zile mbegu njema ni wana wa ufalme; na yale magugu ni wana wa yule mwovu;[#1 Kor 3:9]

³⁹yule adui aliyeyapanda ni Ibilisi; mavuno ni mwisho wa dunia; na wale wavunao ni malaika.

⁴⁰Basi, kama vile magugu yakusanywavyo na kuchomwa motoni; ndivyo itakavyokuwa katika mwisho wa dunia.[#Yn 15:6]

⁴¹Mwana wa Adamu atawatuma malaika wake, nao watakusanya kutoka katika ufalme wake machukizo yote, na hao watendao maasi,[#Sef 1:3; Mt 25:31-46; 7:23]

⁴²na kuwatupa katika tanuri ya moto, ndiko kutakuwako kilio na kusaga meno.[#Mt 8:12]

⁴³Ndipo wenye haki watakapong'aa kama jua katika ufalme wa Baba yao. Mwenye masikio, na asikie.[#Dan 12:3]

Mifano mitatu

⁴⁴Tena ufalme wa mbinguni umefanana na hazina iliyositirika katika shamba; ambayo mtu alipoiona, aliificha; na kwa furaha yake akaenda akauza alivyo navyo vyote, akalinunua shamba lile.[#Mt 19:29; Lk 14:33; Flp 3:7; Mit 2:4]

⁴⁵Tena ufalme wa mbinguni umefanana na mfanya biashara, mwenye kutafuta lulu nzuri;

⁴⁶naye alipoona lulu moja ya thamani kubwa, alikwenda akauza alivyo navyo vyote, akainunua.[#Mit 8:10,11]

⁴⁷Tena ufalme wa mbinguni umefanana na juya, lililotupwa baharini, likakusanya samaki wa kila namna;[#Mt 22:9,10]

⁴⁸hata lilipojaa, walilivuta pwani; wakaketi, wakakusanya walio wema vyomboni, bali walio wabaya wakawatupa.

⁴⁹Ndivyo itakavyokuwa katika mwisho wa dunia; malaika watatokea, watawatenga waovu mbali na wenye haki,[#Mt 25:32]

⁵⁰na kuwatupa katika tanuri ya moto; ndiko kutakuwako kilio na kusaga meno.

Hazina mpya na ya kale

⁵¹Yesu aliwauliza, Mmeyafahamu hayo yote? Wakamwambia, Naam.

⁵²Akawaambia, Kwa sababu hiyo, kila mwandishi mwenye elimu ya ufalme wa mbinguni amefanana na mtu mwenye nyumba atoaye katika hazina yake vitu vipya na vya kale.

⁵³Ikawa Yesu alipoimaliza mifano hiyo, alitoka akaenda zake.[#Mk 6:1-6; Lk 4:15-30]

Kukataliwa kwa Yesu katika Nazareti

⁵⁴Na alipofika mji wa kwao, akawafundisha katika sinagogi lao, hata wakashangaa, wakasema, Huyu amepata wapi hekima hii na miujiza hii?[#Mt 7:28; 11:1; 19:1; 26:1]

⁵⁵Huyu si mwana wa seremala? Mamaye si yeye aitwaye Mariamu? Na nduguze si Yakobo, na Yusufu, na Simoni, na Yuda?

⁵⁶Na dada zake wote hawapo hapa petu? Basi huyu amepata wapi haya yote?[#Yn 7:15,52]

⁵⁷Wakachukizwa naye. Yesu akawaambia, Nabii hakosi kupata heshima, isipokuwa katika nchi yake, na nyumbani mwake mwenyewe.[#Yn 4:44]

⁵⁸Wala hakufanya miujiza mingi huko, kwa sababu ya kutoamini kwao.