Utukufu wa Mungu katika viumbe na hukumu

¹Mbingu zauhubiri utukufu wa Mungu,[#Isa 40:22; Rum 1:19]

Na anga laitangaza kazi ya mikono yake.

²Mchana husemezana na mchana,

Usiku hutolea usiku maarifa.

³Hakuna usemi wala maneno,

Sauti yao haisikilikani.

⁴Sauti yao imeenea duniani kote,[#Rum 10:18]

Na maneno yao hadi miisho ya ulimwengu.

Katika hizo ameliwekea jua hema,

⁵Nalo hutokeza kama bwana arusi akitoka chumbani mwake,[#Mhu 11:7]

Lafurahi kama mtu aliye hodari

Kwenda mbio katika njia yake.

⁶Kuchomoza kwake ni katika mwisho wa mbingu,[#Mhu 1:5]

Na kuzunguka kwake ni hadi miisho ya mbingu,

Wala hakuna kitu

Kisichofikiwa na joto lake.

⁷Sheria ya BWANA ni kamilifu,

Huiburudisha nafsi.

Ushuhuda wa BWANA ni amini,

Humtia hekima mtu asiye nayo.

⁸Maagizo ya BWANA ni ya adili,[#Neh 9:13; Rum 7:12]

Huufurahisha moyo.

Amri ya BWANA ni safi,

Huyatia macho nuru.

⁹Kicho cha BWANA ni kitakatifu,

Kinadumu milele.

Hukumu za BWANA ni kweli,

Zina haki kabisa.

¹⁰Ni za kutamanika kuliko dhahabu,

Kuliko wingi wa dhahabu safi.

Nazo ni tamu kuliko asali,

Kuliko sega la asali.

¹¹Tena mtumishi wako huonywa kwazo,[#Mit 6:22,23]

Katika kuzishika kuna thawabu kuu.

¹²Ni nani awezaye kuyatambua makosa yake?

Unitakase na mambo ya siri.

¹³Umzuie mtumishi wako asitende mambo ya kiburi,

Yasinitawale mimi.

Ndipo nitakapokuwa kamili,

Nami nitakuwa safi, sina kosa lililo kubwa.

¹⁴Maneno ya kinywa changu,[#Isa 44:6]

Na mawazo ya moyo wangu,

Yapate kibali mbele zako, Ee BWANA,

Mwamba wangu, na mwokozi wangu.