Mahimizo ya kuwa na uvumilivu na imani

¹Usihangaike kwa sababu ya watenda mabaya,

Usiwahusudu wafanyao ubatili.

²Maana kama majani watakatika mara,

Kama miche mibichi watanyauka.

³Umtumaini BWANA ukatende mema,

Ukae katika nchi, upendezwe na uaminifu.

⁴Nawe ujifurahishe katika BWANA,[#Ayu 27:10; Wim 2:3; Isa 58:14; 1 Pet 1:8]

Naye atakutimizia haja za moyo wako.

⁵Umkabidhi BWANA njia yako,[#Mt 6:25; 1 Pet 5:7]

Pia umtumainie, naye atakutendea.

⁶Ataitokeza haki yako kama nuru,[#Mik 7:9]

Na hukumu yako kama jina la adhuhuri.

⁷Utulie mbele za BWANA,

Nawe umngojee kwa subira;

Usihangaike juu ya afanikiwaye katika njia yake,

Wala mtu apangaye maovu.

⁸Ukomeshe hasira, uache ghadhabu,[#Ayu 5:2; Zab 73:3; Mit 14:29; Efe 4:26; Yak 1:19]

Usikasirike, mwisho wake ni kutenda mabaya.

⁹Maana watenda mabaya watakatiliwa mbali,

Bali wamngojao BWANA ndio watakaoirithi nchi.

¹⁰Maana bado kitambo kidogo asiye haki hatakuwapo,

Utapaangalia mahali pake wala hatakuwapo.

¹¹Bali wenye upole watairithi nchi,[#Mt 5:5]

Watajifurahisha kwa wingi wa amani.

¹²Asiye haki hunuia mabaya juu ya mwenye haki,

Na kumsagia meno yake.

¹³BWANA atamcheka,[#1 Sam 26:10]

Maana ameona kwamba siku yake inakuja.

¹⁴Wasio haki wamefuta upanga na kupinda uta,

Wamwangushe chini maskini na mhitaji,

Na kuwaua wenye mwenendo wa unyofu.

¹⁵Upanga wao utaingia mioyoni mwao wenyewe,

Na nyuta zao zitavunjika.

¹⁶Kidogo alicho nacho mwenye haki ni bora[#Mit 15:16; 1 Tim 6:6]

Kuliko wingi wa mali wa wasio haki wengi.

¹⁷Maana mikono ya wasio haki itavunjika,

Bali BWANA huwategemeza wenye haki.

¹⁸BWANA huwatunza waaminifu,[#Zab 1:6; Isa 60:21]

Na urithi wao utakuwa wa milele.

¹⁹Hawataaibika wakati wa ubaya,[#Ayu 5:20]

Na siku za njaa watashiba.

²⁰Bali wasio haki watapotea,

Nao wamchukiao BWANA watatoweka,

Kama uzuri wa mashamba,

Kama moshi watatoweka.

²¹Asiye haki hukopa wala halipi,

Bali mwenye haki hufadhili, hukirimu.

²²Maana waliobarikiwa na BWANA watairithi nchi,[#Mit 3:33]

Nao waliolaaniwa naye watakatiliwa mbali.

²³Hatua za mtu mwema huimarishwa na BWANA,[#Zab 121:3; Mit 16:9]

Naye huipenda njia yake.

²⁴Ajapojikwaa hataanguka chini,[#Mik 7:8; 2 Kor 4:9]

Maana BWANA humshika mkono na kumtegemeza.

²⁵Nilikuwa kijana na sasa ni mzee,

Lakini sijamwona mwenye haki ameachwa

Wala mzawa wake akiomba chakula.

²⁶Mchana kutwa hufadhili na kukopesha,

Na mzao wake hubarikiwa.

²⁷Jiepushe na uovu, utende mema,

Na kukaa hata milele.

²⁸Kwa kuwa BWANA hupenda haki,[#Zab 11:7]

Wala hawaachi watauwa wake.

Wao hulindwa milele,

Bali mzawa wa wasio haki ataharibiwa.

²⁹Wenye haki watairithi nchi,

Nao watakaa humo milele.

³⁰Kinywa chake mwenye haki hunena hekima,

Na ulimi wake husema hukumu.

³¹Sheria ya Mungu wake imo moyoni mwake.

Hatua zake hazitelezi.

³²Mtu asiye haki humvizia mwenye haki,

Na kutafuta jinsi ya kumwua.

³³BWANA hatamwacha mkononi mwake,[#Zab 109:31]

Wala hatamwacha alaumiwe atakapohukumiwa.

³⁴Wewe umngoje BWANA,

Uishike njia yake,

Naye atakutukuza uirithi nchi,

Utawaona Wasio haki wakiangamizwa.

³⁵Nimemwona mtu asiye haki mkali sana,

Akijieneza kama mwerezi wa Lebanoni.

³⁶Nikapita na kumbe! Hayuko,

Nikamtafuta wala hakuonekana.

³⁷Umwangalie sana mtu mkamilifu,[#Ayu 1:1; Isa 32:17; Lk 2:25-30; Mdo 7:59,60; 1 The 4:17; 2 Tim 4:6-8; 2 Pet 1:14]

Umtazame mtu mnyofu,

Maana mwisho wake mtu huyo ni amani.

³⁸Wakosaji wataangamizwa pamoja,

Wasio haki mwisho wao wataharibiwa.

³⁹Na wokovu wa wenye haki una BWANA;[#Zab 3:8; Isa 12:2; Yon 2:8]

Yeye ni ngome yao wakati wa taabu.

⁴⁰Naye BWANA huwasaidia na kuwaopoa;[#1 Nya 5:20; Dan 3:17]

Huwaopoa kutoka kwa wasio haki na kuwaponya;

Kwa kuwa wamemtumaini Yeye.