MGA AWIT 111

Ang Panginoon ay pinuri dahil sa Kaniyang kagalingan.

¹Purihin ninyo ang Panginoon.

Ako'y magpapasalamat sa Panginoon ng aking buong puso,

Sa kapulungan ng matuwid, at sa kapisanan.

²Ang mga gawa ng Panginoon ay dakila,

Siyasat ng lahat na nagtatamo ng kaligayahan diyan.

³Ang kaniyang gawa ay karangalan at kamahalan:[#Awit 145:5.]

At ang kaniyang katuwiran ay nananatili magpakailan man.

⁴Kaniyang ginawa ang kaniyang mga kababalaghang gawa upang alalahanin:

Ang Panginoon ay mapagbiyaya at puspos ng kahabagan.

⁵Siya'y nagbigay ng pagkain sa nangatatakot sa kaniya:[#Mat. 6:26, 33.]

Kaniyang aalalahaning lagi ang kaniyang tipan.

⁶Kaniyang ipinakilala sa kaniyang bayan ang kapangyarihan ng kaniyang mga gawa,

Sa pagbibigay niya sa kanila ng mana ng mga bansa.

⁷Ang mga gawa ng kaniyang mga kamay ay katotohanan at kahatulan:[#Apoc. 15:3.]

Lahat niyang mga tuntunin ay tunay.

⁸Nangatatatag magpakailankailan man,[#Is. 40:8; Mat. 5:8.]

Mga yari sa katotohanan at katuwiran.

⁹Siya'y nagsugo ng katubusan sa kaniyang bayan;[#Awit 107:20; Luc. 1:68.]

Kaniyang iniutos ang kaniyang tipan magpakailan man:

Banal at kagalanggalang ang kaniyang pangalan.

¹⁰Ang pagkatakot sa Panginoon ay pasimula ng karunungan;[#Deut. 4:6.]

May mabuting pagkaunawa ang lahat na nagsisisunod ng kaniyang mga utos .

Ang kaniyang kapurihan ay nananatili magpakailan man.