MGA AWIT 20

Panalangin upang magtagumpay sa kaaway. Sa Pangulong Manunugtog. Awit ni David.

¹Ang Panginoon ay sumasagot sa iyo sa araw ng kabagabagan;

Itaas ka sa mataas ng pangalan ng Dios ni Jacob;

²Saklolohan ka mula sa santuario,[#2 Cron. 20:8; Awit 73:17.]

At palakasin ka mula sa Sion;

³Alalahanin nawa ang lahat ng iyong mga handog,

At tanggapin niya ang iyong mga haing sinunog; (Selah)

⁴Pagkalooban ka nawa ng nais ng iyong puso,[#Awit 21:2.]

At tuparin ang lahat ng iyong payo.

⁵Kami ay magtatagumpay sa iyong pagliligtas,[#Awit 9:14.]

At sa pangalan ng aming Dios ay aming itataas ang aming mga watawat:

Ganapin nawa ng Panginoon ang lahat ng iyong mga hingi.

⁶Talastas ko ngayon na inililigtas ng Panginoon ang kaniyang pinahiran ng langis;[#Awit 2:2.]

Sasagutin niya siya mula sa kaniyang banal na langit

Ng pangligtas na kalakasan ng kaniyang kanang kamay.

⁷Ang iba ay tumitiwala sa mga karo, at ang iba ay sa mga kabayo:[#Kaw. 21:31; Is. 31:1.]

Nguni't babanggitin namin ang pangalan ng Panginoon naming Dios.

⁸Sila'y nangakasubsob at buwal:

Nguni't kami ay nakatindig at nakatayo na matuwid.

⁹Magligtas ka, Panginoon:

Sagutin nawa kami ng Hari pagka kami ay nagsisitawag.