2 Samuel 17

¹Sinabi ni Ahitofel kay Absalom, “Payagan nʼyo po akong pumili ng 12,000 tauhan para hanapin sina David ngayong gabi.[#17:1 : O Pipili ako.]

²Sasalakayin namin sila habang pagod sila at nanghihina. Matataranta sila at magsisitakas ang mga tauhan niya. Ang hari lang po ang papatayin ko,

³at pababalikin ko sa inyo ang lahat ng tauhan niya gaya ng pagbabalik ng asawa sa kabiyak nito. Kapag napatay si David, hindi na makakalaban ang mga tauhan niya.”

⁴Mukhang mabuti naman ang payo na ito para kay Absalom at sa lahat ng tagapamahala ng Israel.

⁵Pero sinabi ni Absalom, “Tawagin natin si Husai na Araceo, at nang malaman natin kung ano ang masasabi niya.”

⁶Kaya nang dumating si Husai, sinabi sa kanya ni Absalom ang payo ni Ahitofel. Pagkatapos, nagtanong si Absalom, “Gagawin ba natin ang sinabi niya? Kung hindi, ano ang dapat nating gawin?”

⁷Sumagot si Husai, “Sa ngayon, hindi maganda ang ipinayo ni Ahitofel.

⁸Kilala nʼyo ang inyong ama at ang kanyang mga tauhan; magigiting silang mandirigma at mababangis tulad ng oso na inagawan ng mga anak. Bukod pa riyan, bihasa ang ama nʼyo sa pakikipaglaban, at hindi siya natutulog na kasama ng mga tauhan niya.

⁹Maaaring sa oras na itoʼy nagtatago siya sa kuweba o sa ibang lugar. Kung sa unang paglalaban nʼyo ay mapatay ang iba sa mga sundalo nʼyo, sasabihin ng makakarinig nito na natalo na ang mga sundalo ninyo.

¹⁰Kahit ang pinakamagigiting nʼyong sundalo na kasintapang ng leon ay matatakot. Sapagkat nalalaman ng lahat ng Israelita na ang ama ninyoʼy bihasang mandirigma at matatapang ang tauhan niya.

¹¹“Ang payo ko, tipunin nʼyo ang buong hukbo ng mga Israelita mula sa Dan hanggang Beer-seba, na kasindami ng buhangin sa tabing-dagat. At kayo mismo ang mamuno sa kanila sa pakikipaglaban.[#17:11 : Ang ibig sabihin, ang buong Israel.]

¹²Hahanapin natin si David saan man siya naroon. Susugod tayo sa kanya na gaya ng pagpatak ng hamog sa lupa at walang makakaligtas isa man sa kanila.

¹³Kung tatakas siya sa isang bayan doon, ang buong Israel ay nandoon na naghihintay sa iyong iuutos. Pagkatapos, maaari naming talian ang pader nito at hilahin papunta sa kapatagan hanggang sa magiba ito, at hanggang sa wala nang batong matitira roon.”

¹⁴Sinabi ni Absalom at ng lahat ng namumuno sa Israel, “Mas mabuti ang payo ni Husai na Araceo kaysa kay Ahitofel.” Ang totoo, mas mabuti ang payo ni Ahitofel, pero niloob ng Panginoon na hindi ito sundin ni Absalom upang ibagsak siya.

¹⁵Sinabi ni Husai sa mga paring sina Sadoc at Abiatar ang payo ni Ahitofel kay Absalom at sa mga tagapamahala ng Israel, at pati na rin ang ibinigay niyang payo.

¹⁶Pagkatapos, sinabi niya sa kanila, “Ipaalam nʼyo agad kay David na huwag siyang magpaiwan sa tawiran ng Ilog Jordan sa disyerto ngayong gabi, dahil kung hindi ay siguradong papatayin siya at ang lahat ng mga kasama niya.”

¹⁷Nang mga panahong iyon, naghihintay sina Jonatan na anak ni Abiatar at si Ahimaaz na anak ni Sadoc sa En-rogel, dahil ayaw nilang makitang labas-masok sila lungsod ng Jerusalem. Pinapapunta na lang nila ang isang aliping babae upang sabihin sa kanila ang nangyayari, at saka nila ito sasabihin kay Haring David.

¹⁸Pero isang araw, nakita sila ng isang binatilyo, kaya sinabi niya ito kay Absalom. Kaya nagmamadaling umalis ang dalawa, at pumunta sa bahay ng isang lalaki sa Bahurim. Mayroong balon ang lalaking ito na malapit sa bahay niya, at doon, bumaba sina Jonatan at Ahimaaz para magtago.

¹⁹Kumuha ng takip ang asawa ng lalaki, tinakpan ang balon, at nagbilad siya ng butil sa ibabaw nito para walang maghinalang may nagtatago roon.

²⁰Nang makarating ang mga tauhan ni Absalom sa bahay ng lalaki, tinanong nila ang asawa nito, “Nakita nʼyo ba sina Ahimaaz at Jonatan?” Sumagot ang asawa, “Tumawid sila sa ilog.” Hinanap sila ng mga tauhan pero hindi sila nakita, kaya bumalik sila sa Jerusalem.

²¹Nang makaalis ang mga tauhan ni Absalom, lumabas sina Jonatan at Ahimaaz sa balon, at pumunta sila kay Haring David. Sinabi nila sa kanya, “Tumawid po kayo agad sa ilog dahil nagpayo si Ahitofel na patayin kayo.”

²²Kaya tumawid si David at ang mga tauhan niya sa Ilog Jordan, at kinaumagahan, nakatawid na sila sa kabila.

²³Nang malaman ni Ahitofel na hindi sinunod ang payo niya, sumakay siya sa asno niya at umuwi sa bayan niya. Pagkatapos niyang magbigay ng mga habilin sa sambahayan niya, nagbigti siya. Inilibing siya sa pinaglibingan ng kanyang ama.

²⁴Nakarating na si David at ang mga tauhan niya sa Mahanaim. Nakatawid na noon si Absalom at ang mga tauhan nito sa Ilog Jordan.

²⁵Pinili ni Absalom si Amasa na kapalit ni Joab bilang kumander ng mga sundalo. Si Amasa ay anak ni Jeter na Ismaelita. Ang ina niya ay si Abigail na anak ni Nahas at kapatid ng ina ni Joab na si Zeruias.[#17:25 : Itoʼy batay sa ibang tekstong Septuagint (Tingnan din sa 1 Cro. 2:17); sa Hebreo, Israelita.]

²⁶Nagkampo si Absalom at ang mga Israelita sa Gilead.

²⁷Nang dumating sina David sa Mahanaim, binati sila nina Shobi na anak ni Nahas na Amonitang taga-Rabba, Maquir na anak ni Amiel na taga-Lodebar, at Barzilai na Gileaditang taga-Rogelim.

²⁸May dala silang mga higaan, mangkok, palayok, trigo, sebada, harina, binusang butil, buto ng mga gulay,

²⁹pulot, mantika, keso at tupa. Ibinigay nila ito kay David at sa mga tauhan niya, dahil alam nilang gutom, pagod, at uhaw na ang mga ito sa paglalakbay nila sa ilang.