Hoseas 3

Si Hoseas at ang Kanyang Asawa

¹Sinabi ng Panginoon sa akin, “Umalis ka at ipakita mong muli ang iyong pagmamahal sa iyong asawa kahit na nangangalunya siya. Mahalin mo siya katulad ng pagmamahal ko sa mga mamamayan ng Israel kahit na sumasamba sila sa ibang mga diyos at gustong maghandog sa kanila ng mga tinapay na may mga pasas.”

²Kaya binili ko siya sa halagang labinlimang pirasong pilak at apat na sakong sebada.[#3:2 : Hindi matiyak kung siyaʼy kailangang bilhin. Iba-iba ang mga pakahulugan dito.; #3:2 : Sa Septuagint, tatlong sakong sebada at ilang litrong alak.]

³At sinabi ko sa kanya, “Makisama ka sa akin ng mahabang panahon, at huwag ka nang sumiping sa ibang lalaki. Kahit ako ay hindi muna sisiping sa iyo.”

⁴Nangangahulugan ito na sa mahabang panahon ang mga Israelita ay mawawalan ng hari, pinuno, mga handog, alaalang bato, espesyal na damit sa panghuhula, at mga diyos-diyosan.[#3:4 : Sa Hebreo, efod.]

⁵Ngunit sa bandang huli, magbabalik-loob silang muli sa Panginoon nilang Diyos at sa lahi ni David na kanilang hari. Buong paggalang silang lalapit sa Panginoon dahil sa kanyang kabutihan.