Job 5

¹“Job, kahit humingi ka ng tulong,

walang tutulong sa iyo.

Kahit ang mga anghel

ay hindi ka tutulungan.

²Ang sama ng loob

ay pumapatay sa hangal,

at ang paninibugho

ay pumupuksa sa taong mangmang.

³Ayon sa aking nakita at nalaman,

maaaring umunlad ang pamumuhay

ng isang hangal,

ngunit bigla na lang isusumpa ng Diyos

ang sambahayan niya.

⁴Ang mga anak niyaʼy

walang malalapitan

at wala ring magtatanggol

sa kanila sa hukuman.

⁵Ang ani niyaʼy kakainin ng iba.

At kahit ang mga bungang nasa tinikan

ay kukunin ng mga taong gutom.

Ang kayamanan niyaʼy aagawin

ng mga taong uhaw

sa mga ari-arian.

⁶Ang kahirapan ay hindi galing sa alikabok

at ang kaguluhan

ay hindi umuusbong sa lupa.

⁷Ngunit likas sa tao

ang ipanganak sa kaguluhan,

tulad ng tilamsik ng apoy

na pumapailanlang.

⁸“Kung ako sa iyo,

lalapit ako sa Diyos.

Sasabihin ko sa kanya

ang aking kalagayan.

⁹Sapagkat gumagawa siya

ng mga kahanga-hangang bagay

at mga himalang hindi kayang

unawain o bilangin.

¹⁰Nagpapadala siya ng ulan sa mundo

at pinatutubigan niya ang mga bukirin.

¹¹Itinataas niya

ang mga nagpapakumbaba

at kinakalinga ang mga nagdadalamhati.

¹²Sinisira niya ang plano

ng mga mandaraya,

upang hindi sila magtagumpay.

¹³Hinuhuli niya ang marurunong

sa kanilang katusuhan,

at hinahadlangan ang plano

ng mga mapanlinlang.

¹⁴Hindi sila nakakakita

kahit maliwanag,

at nangangapa sa kadiliman

kahit na katanghalian.

¹⁵Inililigtas ng Diyos ang mga dukha

mula sa kamatayan

at sa mga taong makapangyarihan

na umaapi sa kanila.

¹⁶Kaya may pag-asa ang mga dukha,

ngunit ang masasama

ay kanyang sinasaway.

¹⁷“Mapalad ang taong itinutuwid ng Diyos

ang pag-uugali.

Kaya huwag mong mamasamain

ang pagtutuwid

ng Diyos na Makapangyarihan sa iyo.

¹⁸Sapagkat ang sinusugatan niya

ay kanya ring ginagamot.

Ang kanyang sinasaktan

ay kanyang pinapagaling.

¹⁹Palagi ka niyang ililigtas

sa mga salot at panganib.

²⁰Ililigtas ka niya sa kamatayan

sa panahon ng taggutom at digmaan.

²¹Iingatan ka niya

kung sisiraan ka ng iba,

at wala kang katatakutan

kung dumating man

ang kapahamakan.

²²Tatawanan mo

ang taggutom at kapahamakan,

at ang mababangis na hayop

ay hindi mo katatakutan.

²³Makikipagkasundo ka sa mga bato sa parang

at sa gitna ng mga mababangis na hayop

ay mamumuhay kang may kapayapaan.

²⁴Mamumuhay ng payapa

ang sambahayan mo

at walang mawawala

sa iyong mga hayop.

²⁵Dadami ang iyong angkan

na parang kasindami ng mga damo sa lupa.

²⁶Hahaba ang buhay mo

at hindi ka mamamatay

nang hindi sa tamang panahon.

²⁷“Ayon sa aming nalaman

at naranasan,

ay aming napatunayan

na talagang totoo ang lahat ng ito.

Kaya dinggin mo ito

at isabuhay para sa ikabubuti mo.”