Kawikaan 18

¹Ang taong makasarili

ay humihiwalay sa karamihan

at sumasalungat sa lahat

ng tamang kaisipan.

²Ang taong hangal

ay hindi naghahangad na matuto;

ang gusto lang niya

ay masabi ang nasa isipan.

³Ang paggawa ng kasamaan

at nakakahiyang mga bagay

ay makapagbibigay ng kahihiyan.

⁴Ang salita ng taong marunong

ay nakapagbibigay ng karunungan sa iba;

ito ay katulad ng tubig na umaagos

mula sa malalim na batis.

⁵Hindi mabuting kampihan

ang taong nagkasala

at hindi mabuting ipagkait

ang katarungan

sa taong walang kasalanan.

⁶Ang sinasabi ng taong hangal

ang pinagsisimulan ng alitan

at magdadala sa kanya

sa kaguluhan.

⁷Ang mga sinasabi ng hangal

ang magpapahamak sa kanya

at ang kanyang mga labi

ay bitag sa kanyang buhay.

⁸Ang tsismis

ay parang pagkaing masarap nguyain at lunukin;

at nakakarating sa kaloob-looban ng tao.

⁹Ang taong tamad magtrabaho,

pareho ng mapanirang tao.

¹⁰Ang Panginoon ay katulad

ng toreng matibay,

kanlungan ng mga matuwid

sa oras ng panganib.

¹¹Ang akala ng taong mayaman

ay maipagtatanggol siya

ng kanyang kayamanan

tulad ng mga pader na nakapalibot

sa buong bayan.

¹²Ang pagmamataas ng tao

ang magpapahamak sa kanya,

ngunit ang pagpapakumbaba

ang magpaparangal sa kanya.

¹³Hangal at kahiya-hiya

ang taong sumasagot sa usapan

nang hindi muna nakikinig.

¹⁴Sa taong may karamdaman,

tatag ng loob ang magbibigay kalakasan.

Kung mawawalan siya ng pag-asa,

wala nang makakatulong pa sa kanya.

¹⁵Ang taong marunong at nakauunawa

ay lalo pang naghahangad

ng karunungan.

¹⁶Madaling makikipagkita

sa iyo ang dakilang tao

kapag may dala kang regalo

para sa kanya.

¹⁷Ang unang naglahad ng salaysay sa korte

ay parang iyon na ang totoo,

hanggang hindi pa nasusuri

at natatanong ng kabilang panig.

¹⁸Napapatigil ng palabunutan

ang mga alitan,

at pinagkakasundo ang mahigpit

na magkalaban.

¹⁹Mas madali pang sakupin

ang isang napapaderang bayan

kaysa sa makipagbati

sa kapatid na nasaktan.

Kung paanong mahirap wasakin

ang mga kandado ng tarangkahan

ng palasyo,

mahirap din pigilin ang alitan

ng dalawang tao.

²⁰Sa bunga ng bibig ng tao,

mabubusog ang kanyang tiyan.

At sa kahihinatnan ng salitang

kanyang binibitawan,

siya ay nasisiyahan.

²¹Ang salita ng tao

ay makapagliligtas ng buhay

o kaya ay nakamamatay.

Kaya mag-ingat sa pagsasalita

sapagkat aanihin mo ang mga bunga nito.

²²Kung nakapag-asawa ka,

nakatanggap ka ng kabutihan,

at ito ang nagpapakita na mabuti

ang Panginoon sa iyo.

²³Nakikiusap ang dukha,

ngunit ang mayaman

ay masakit magsalita.

²⁴May mga kaibigang nagdudulot

ng kapahamakan

ngunit may kaibigan mas malapít pa

kaysa sa kapatid.