Ecclesiastico 2

Katapatan sa Diyos

¹Anak, kung nais mong maglingkod sa Panginoon,

humanda ka sa mga pagsubok.

²Maging tapat ka at magpakatatag,

huwag kang masisiraan ng loob sa panahon ng kasawian.

³Manalig ka sa Panginoon at huwag kang lalayo sa kanya,

upang ikaw ay parangalan sa katapusan ng iyong buhay.

⁴Tanggapin ang anumang ipagkaloob niya sa iyo,

tiisin mo ang kabiguan kahit ano ang mangyari.

⁵Kung ang ginto ay dinadalisay sa apoy,[#Kar. 3:5-6; 1 Ped. 1:7.]

ang banal ay sinusubok ng Panginoon sa apoy ng paghamak.

⁶Magtiwala ka at tutulungan ka niya,

mamuhay ka sa katuwiran at umasa sa kanya.

⁷Kayong may paggalang sa Panginoon, maghintay kayo ng kanyang habag;

huwag kayong lalayo sa kanya nang hindi kayo mapahamak.

⁸Kayong may paggalang sa Panginoon, magtiwala kayo sa kanya,

at siguradong tatanggap kayo ng gantimpala.

⁹Kayong lahat na may paggalang sa Panginoon, umasa kayo sa kanyang pagpapala.

Asahan ninyo ang kanyang pagkahabag at kagalakang walang hanggan.

¹⁰Tingnan ninyo ang nangyari sa ating mga ninuno:

May nagtiwala ba sa Panginoon at nabigo?

May nanatili bang naglilingkod sa kanya na kanyang pinabayaan?

May tumawag ba sa kanya na hindi niya dininig?

¹¹Sapagkat maawain at mapagpatawad ang Panginoon,

pinatatawad niya tayo sa ating kasalanan at inililigtas sa kagipitan.

¹²Kawawa ang mahihinang-loob at mga tamad,

kawawa ang makasalanang mapagkunwari.

¹³Kawawa ang mahihina ang loob! Ayaw nilang magtiwala,

kaya hindi naman sila tatangkilikin.

¹⁴Kawawa kayong mga nawalan ng pag-asa at ayaw nang makibaka,

ano ang gagawin ninyo kapag pinarusahan kayo ng Panginoon?

¹⁵Ang mga may paggalang sa Panginoon at di sumusuway sa kanyang utos,[#Kar. 6:18; Jn. 14:15, 21, 23.]

ang mga umiibig sa kanya'y namumuhay ayon sa kanyang kalooban.

¹⁶Ang mga may paggalang sa Panginoon ay nagsisikap na siya'y bigyang-lugod;

ang kanyang Kautusan ang umiiral sa buhay ng mga umiibig sa kanya.

¹⁷Ang mga may paggalang sa Panginoon ay handang maglingkod sa kanya,

nagpapakababa sila sa kanyang harapan. Sabi nila,

¹⁸“Ipinagkakatiwala natin ang ating buhay sa Panginoon sa halip na sa mga tao,

sapagkat kapantay ng kanyang kamahalan ang kanyang habag.”