¹Прешедша же амфиполь и аполлонию, внидоста в солунь, идеже бе сонмище иудейское.

²По обычаю же своему павел вниде к ним и по субботы три стязашеся с ними от писаний,

³сказуя и предлагая им, яко Христу подобаше пострадати и воскреснути от мертвых, и яко сей Иисус, егоже аз проповедую вам, есть Христос.

⁴И нецыи от них вероваша и приложишася к павлу и силе, от честивых еллин множество много и от жен благородных не мало.

⁵Возревновавше же непокоршиися иудее и приемше крамолники некия мужы злыя, и собравше народ, молвяху по граду: нашедше же на дом иассонов, искаху их извести к народу.

⁶Не обретше же их, влечаху иассона и некия от братий ко градоначалником, вопиюще, яко, иже развратиша вселенную, сии и зде приидоша,

⁷ихже прият иассон: и сии вси противно велением кесаревым творят, Царя глаголюще иного быти, Иисуса.

⁸Смятоша же народ и градоначалники слышащыя сия:

⁹вземше же доволное от иассона и от прочих, отпустиша их.

¹⁰Братия же абие в нощи отслаша павла и силу в берию: иже пришедша, идоста в собор иудейский.

¹¹Сии же бяху благороднейши живущих в солуни, иже прияша слово со всем усердием, по вся дни разсуждающе писания, аще суть сия тако.

¹²Мнози убо от них вероваша, и от еллинских жен благообразных и мужей не мало.

¹³И яко уведаша иже от солуня иудее, яко и в берии проповедася от павла слово Божие, приидоша и тамо движуще и смущающе народы.

¹⁴Абие же тогда братия отпустиша павла ити на поморие: остаста же сила и тимофей тамо.

¹⁵Провождающии же павла ведоша его даже до афин, и приемше заповедь к силе и тимофею, да яко скорее приидут к нему, изыдоша.

¹⁶Во афинех же ждущу их павлу, раздражашеся дух его в нем зрящем идол полн сущь град.

¹⁷Стязашеся же убо на сонмищи со иудеи и с честивыми, и на торжищи по вся дни с приключающимися.

¹⁸Нецыи же от епикур и от стоик философ стязахуся с ним: и нецыи глаголаху: что убо хощет суесловивый сей глаголати? Инии же: чуждих богов мнится проповедник быти: яко Иисуса и воскресение благовествоваше им.

¹⁹Поемше же его, ведоша на ареопаг, глаголюще: можем ли разумети, что новое сие глаголемое тобою учение?

²⁰странна бо некая влагаеши во ушеса наша: хощем убо разумети, что хотят сия быти?

²¹Афинее же вси и приходящии страннии ни во чтоже ино упражняхуся, разве глаголати что или слышати новое.

²²Став же павел посреде ареопага, рече: мужие афинейстии, по всему зрю вы аки благочестивыя:

²³проходя бо и соглядая чествования ваша, обретох и капище, на немже бе написано: неведомому Богу. Егоже убо не ведуще (благолепне) чтете, сего аз проповедую вам.

²⁴Бог сотворивый мир и вся, яже в нем, сей небесе и земли Господь сый, не в рукотворенных храмех живет,

²⁵ни от рук человеческих угождения приемлет, требуя что, сам дая всем живот и дыхание и вся:

²⁶сотворил же есть от единыя крове весь язык человечь, жити по всему лицу земному, уставив предучиненая времена и пределы селения их,

²⁷взыскати Господа, да поне осяжут его и обрящут, яко не далече от единаго коегождо нас суща:

²⁸о нем бо живем и движемся и есмы, якоже и нецыи от ваших книжник рекоша: сего бо и род есмы.

²⁹Род убо суще Божий, не должни есмы непщевати подобно быти Божество злату, или сребру, или каменю художне начертану, и смышлению человечу:

³⁰лета убо неведения презирая Бог, ныне повелевает человеком всем всюду покаятися:

³¹зане уставил есть день, в оньже хощет судити вселенней в правде, о мужи, егоже предустави, веру подая всем, воскресив его от мертвых.

³²Слышавше же воскресение мертвых, овии убо ругахуся, овии же реша: да слышим тя паки о семе.

³³И тако павел изыде от среды их.

³⁴Нецыи же мужие прилепившеся ему, вероваша: в нихже бе и дионисий ареопагитский, и жена именем дамарь, и друзии с ними.