Wimbo wa kumsifu Mungu

¹Nitakutukuza, ee Mungu wangu na mfalme wangu;

nitalitukuza jina lako daima na milele.

²Nitakutukuza kila siku;

nitalisifu jina lako daima na milele.

³Mwenyezi-Mungu ni mkuu, astahili sifa nyingi;

ukuu wake hauwezi kuchunguzika.

⁴Kizazi hata kizazi, sifa za matendo yako zitasimuliwa,

watu watatangaza matendo yako makuu.

⁵Nitanena juu ya utukufu na fahari yako,

nitayatafakari matendo yako ya ajabu.

⁶Watu watatangaza ukuu wa matendo yako ya ajabu,

nami nitatangaza ukuu wako.

⁷Watatangaza sifa za wema wako mwingi,

na kuimba juu ya uadilifu wako.

⁸Mwenyezi-Mungu ni mwenye huruma na rehema;

hakasiriki ovyo, amejaa fadhili.

⁹Mwenyezi-Mungu ni mwema kwa wote,

ni mwenye huruma kwa viumbe vyake vyote.

¹⁰Viumbe vyako vyote vitakushukuru, ee Mwenyezi-Mungu,

nao waaminifu wako watakutukuza.

¹¹Watasema juu ya utukufu wa ufalme wako,

na kutangaza juu ya nguvu yako kuu,

¹²ili kila mtu ajue matendo yako makuu,

na fahari tukufu ya ufalme wako.

¹³Ufalme wako ni ufalme wa milele;

mamlaka yako yadumu vizazi vyote.

Mwenyezi-Mungu ni mwaminifu katika ahadi zake zote,

ni mwema katika matendo yake yote.

¹⁴Mwenyezi-Mungu huwategemeza wote wanaoanguka;

huwainua wote waliokandamizwa.

¹⁵Viumbe vyote vinakutazama kwa hamu,

nawe wavipa chakula chao kwa wakati wake.

¹⁶Waufumbua mkono wako kwa ukarimu,

watosheleza mahitaji ya kila kiumbe hai.

¹⁷Mwenyezi-Mungu ni mwadilifu katika njia zake zote;

ni mwema katika matendo yake yote.

¹⁸Mwenyezi-Mungu yuko karibu na wote wanaomwomba,

wote wanaomwomba kwa moyo mnyofu.

¹⁹Huwapatia mahitaji yao wote wanaomcha;

husikia kilio chao na kuwaokoa.

²⁰Mwenyezi-Mungu huwalinda wote wanaompenda;

lakini atawaangamiza waovu wote.

²¹Nitatangaza sifa za Mwenyezi-Mungu;

viumbe vyote vilisifu jina lake takatifu,

milele na milele.