Mungu mshindi

¹Mungu anajulikana katika Yuda;

jina lake ni kuu katika Israeli.

²Makao yake yamo huko Salemu;[#76:2 Jina la zamani la Yerusalemu.]

maskani yake huko Siyoni.

³Huko alivunja mishale ya adui;

alivunja ngao, panga na silaha za vita.

⁴Wewe, ee Mungu, watukuka mno;

umejaa fahari kuliko milima ya milele.

⁵Wenye nguvu walipokonywa nyara zao,

sasa wamelala usingizi wa kifo,

mashujaa wa vita hawakuweza kutumia mikono yao.

⁶Ulipowakemea, ee Mungu wa Yakobo,

farasi na wapandafarasi walikufa ganzi.

⁷Wewe, ee Mungu, ni wa kutisha mno!

Nani awezaye kustahimili mbele yako ukikasirika?

⁸Ulijulisha hukumu yako toka mbinguni;

dunia iliogopa na kunyamaza;

⁹wakati ulipoinuka kutekeleza hukumu,

kuwaokoa wote wanaodhulumiwa duniani.

¹⁰Ghadhabu ya watu husababisha tu sifa kwako;

na waliookoka vitani watafanya sikukuu zako.

¹¹Mtimizieni Mwenyezi-Mungu, Mungu wenu ahadi zenu;

enyi mlio karibu mpeni zawadi Mungu wa kutisha.

¹²Yeye huzitoa roho za wakuu;

huwatisha wafalme wa dunia.