Yesu anazungumza juu ya kuharibiwa kwa hekalu

¹Yesu alitoka hekaluni, na alipokuwa akienda zake, wanafunzi wake walimwendea, wakamwonesha majengo ya hekalu.[#24:1—25:46 Sehemu hii ni simulizi kuu la tano la Yesu nalo lahusu mwisho wa nyakati (sura 24—25); taz Utangulizi wa Injili ya Mathayo.]

²Yesu akawaambia, “Sawa, mnaweza kuyatazama haya yote! Kweli nawaambieni, hakuna hata jiwe moja litakalosalia hapa juu ya lingine; kila kitu kitaharibiwa.”[#24:2 Hekalu la Yerusalemu liliteketezwa na majeshi ya Waroma mwaka 70 B.K. (rejea Luka 19:44). Majeshi hayo yaliongozwa na mtawala Tito, mtawala wa Kiroma.]

Taabu na mateso

³Yesu alipokuwa ameketi juu ya mlima wa Mizeituni, wanafunzi walimwendea faraghani, wakamwuliza, “Tuambie mambo haya yatatukia lini? Ni ishara gani itakayoonesha kuja kwako na mwisho wa nyakati?”[#24:3 Katika Marko ni Petro, Yakobo na Yohane.; #24:3 Matukio hayo mawili yanaonekana kuwa na uhusiano; kuja kwa Mwana wa Mtu kutakuwa ishara ya mwisho wa historia ya binadamu.]

⁴Yesu akawajibu, “Jihadharini msije mkadanganywa na mtu.

⁵Maana wengi watatokea wakisema kila mmoja kwamba yeye ndiye Kristo nao watawapotosha watu wengi.[#24:5 1Yoh 2:18.]

⁶Mtasikia juu ya vita na fununu za vita; lakini msifadhaike, maana hayo hayana budi kutokea, lakini mwisho wenyewe ungali bado.

⁷Taifa moja litapigana na taifa lingine; ufalme mmoja utapigana na ufalme mwingine. Hapa na pale patakuwa na njaa na mitetemeko ya ardhi.

⁸Yote hayo ni kama mwanzo wa maumivu ya kujifungua mtoto.

⁹“Kisha watawatoeni ili mteswe na kuuawa. Mataifa yote yatawachukieni kwa sababu ya jina langu.

¹⁰Tena, wengi wataiacha imani yao, watasalitiana na kuchukiana.

¹¹Watatokea manabii wengi wa uongo watakaowapotosha watu wengi.

¹²Kwa sababu ya ongezeko la uhalifu, upendo wa watu wengi utafifia.

¹³Lakini atakayevumilia mpaka mwisho ndiye atakayeokolewa.

¹⁴Ila, kabla ya mwisho kufika, hii Habari Njema ya ufalme wa Mungu itahubiriwa ulimwenguni kote kama ushuhuda kwa mataifa yote.

Dhiki kuu

¹⁵“Basi, mtakapoona ‘Chukizo Haribifu’ lililonenwa na nabii Danieli limesimama mahali patakatifu, (msomaji na atambue maana yake),[#24:15 Picha iliyotolewa kutoka Dan 9:27; 11:31; 12:11. Matumizi ya msemo huu hapa ni hasa kuhusu kuteketezwa kwa mji wa Yerusalemu na hekalu kutiwa unajisi mwaka wa 70 B.K., taz Luka 21:20.; #24:15 Labda haya ni maneno ya ilani kwa Wakristo kwa vile aya hii ilikuwa na maana iliyofichika kwa watu wa nje.]

¹⁶hapo, walioko Yudea na wakimbilie milimani.

¹⁷Aliye juu ya paa la nyumba yake asishuke kuchukua kitu nyumbani mwake.[#24:17 Taz pia Luka 17:31. Maagizo na maonyo katika sehemu hii ya 24:15-22 yanazungumzia juu ya wakati ambapo majeshi yatavamia Yerusalemu (Luka 21:20-24). Mapaa ya nyumba za wakati huo yalikuwa yamewekwa ubapa na watu waliweza kwenda huko kwa ngazi upande wa nje wa nyumba.]

¹⁸Aliye shambani asirudi nyuma kuchukua vazi lake.

¹⁹Ole wao kina mama waja wazito na wanaonyonyesha siku hizo!

²⁰Ombeni ili kukimbia kwenu kusiwe siku za baridi au siku ya Sabato!

²¹Maana wakati huo kutakuwa na dhiki kuu ambayo haijapata kuwako tangu mwanzo wa ulimwengu mpaka leo, wala haitapata kutokea tena.

²²Kama siku hizo hazingalipunguzwa, hakuna binadamu yeyote ambaye angeokoka; lakini siku hizo zitapunguzwa kwa ajili ya wale walioteuliwa.

²³“Basi, mtu akiwaambieni siku hizo: ‘Kristo yuko hapa’ au ‘Yuko pale,’ msimsadiki.

²⁴Maana watatokea akina Kristo wa uongo na manabii wa uongo. Watafanya ishara kubwa na maajabu ya kuweza kuwapotosha ikiwezekana hata wateule wa Mungu.

²⁵Sikilizeni, nimekwisha waonya kabla ya wakati.

²⁶Basi, wakiwaambieni, ‘Tazameni, yuko jangwani,’ msiende huko; au, ‘Tazameni, amejificha ndani,’ msisadiki;[#24:26-27 Aya hizi ni sambamba na Luka 17:23-24; na 24:28 ni sambamba na Luka 17:37.]

²⁷maana, kama vile umeme uangazavyo toka mashariki hadi magharibi, ndivyo kutakavyokuwa kuja kwake Mwana wa Mtu.

²⁸Pale ulipo mzoga, ndipo watakapokusanyika tai.

Kuja kwake Mwana wa Mtu

²⁹“Mara baada ya dhiki ya siku hizo, jua litatiwa giza, mwezi hautaangaza, nyota zitaanguka kutoka angani, na nguvu za mbingu zitatikiswa.[#24:29 Lugha inayotumiwa hapa inachukua picha kutoka Agano la Kale. Taz Isa 13:10; Eze 32:7; Yoeli 2:10,31; 3:15; Ufu 6:12.; #24:29 Taz Isa 34:4; Ufu 6:13.; #24:29 Nguvu za angani ambazo ilisadikiwa kumiliki nyota na sayari.]

³⁰Kisha, ishara ya Mwana wa Mtu itaonekana angani, na hapo makabila yote duniani yatalalamika; watamwona Mwana wa Mtu akija juu ya mawingu ya angani mwenye nguvu na utukufu mwingi.[#24:30: Tazama Dan 7:13; Zek 12:10-14; Rev 1:7.]

³¹Naye atawatuma malaika wake wenye tarumbeta la kuvuma sana, nao watawakusanya wateule wake kutoka pande zote nne za dunia, toka mwisho huu wa mbingu hadi mwisho huu.

Mfano wa mtini

³²“Kwa mtini jifunzeni mfano huu: Mara tu matawi yake yanapoanza kuwa laini na kuchanua majani, mnajua kwamba wakati wa mavuno umekaribia.

³³Hali kadhalika nanyi mtakapoona mambo haya yote yakitendeka, jueni kwamba yuko karibu sana.

³⁴Nawaambieni kweli, kizazi hiki hakitapita kabla ya mambo hayo yote kutukia.[#24:34 Hayo mambo yaliyotajwa katika aya zilizotangulia yangetukia wakati wasikilizaji wake Yesu wakiwa bado hai (16:28).]

³⁵Mbingu na dunia zitapita, lakini maneno yangu hayatapita kamwe.

Hakuna ajuaye siku wala saa

³⁶“Lakini, juu ya siku au saa hiyo, hakuna mtu ajuaye itakuja lini; wala malaika wa mbinguni, wala Mwana; Baba peke yake ndiye ajuaye.[#24:36 Hati nyingine za kale hazina maneno haya.]

³⁷Kwa maana kama ilivyokuwa nyakati za Noa, ndivyo itakavyokuwa kuja kwake Mwana wa Mtu.

³⁸Maana nyakati hizo, kabla ya gharika kuu, watu walikuwa wakila na kunywa, wakioa na kuolewa, mpaka Noa alipoingia ndani ya ile safina.

³⁹Hawakujua kuna nini mpaka ile gharika ilipotokea, ikawakumba wote. Ndivyo itakavyokuwa wakati Mwana wa Mtu atakapokuja.

⁴⁰Wakati huo watu wawili watakuwa shambani; mmoja atachukuliwa na mwingine ataachwa.

⁴¹Kina mama wawili watakuwa wanasaga nafaka, mmoja atachukuliwa na mwingine ataachwa.

⁴²Basi, kesheni, kwa maana hamjui siku atakayokuja Bwana wenu.

⁴³Lakini kumbukeni jambo hili: kama mwenye nyumba angejua siku mwizi atakapofika, angekesha, wala hangeiacha nyumba yake ivunjwe.[#24:43 Kuhusu 24:43-44, taz Luka 12:39-40. Onyo la namna hiyohiyo liko katika 1Thes 5:2 na Ufu 3:3.]

⁴⁴Kwa hiyo, nanyi pia muwe tayari, kwa maana Mwana wa Mtu atakuja saa msiyoitazamia.”

Mtumishi mwaminifu na asiye mwaminifu

⁴⁵Yesu akaendelea kusema, “Ni nani basi mtumishi mwaminifu na mwenye busara, ambaye bwana wake atamweka juu ya watu wake, awape chakula kwa wakati wake?

⁴⁶Heri mtumishi yule ambaye bwana wake atakapokuja atamkuta akifanya hivyo.

⁴⁷Kweli nawaambieni, atamweka mtumishi huyo aisimamie mali yake yote.

⁴⁸Lakini kama mtumishi mbaya akijisemea moyoni: ‘Bwana wangu amekawia kurudi,’

⁴⁹kisha akaanza kuwapiga watumishi wenzake, akaanza kula na kunywa pamoja na walevi,

⁵⁰bwana wake atakuja siku asiyoitazamia na saa asiyoijua.

⁵¹Atamwadhibu vibaya na kumweka kundi moja na wanafiki. Huko kutakuwa na kilio na kusaga meno.[#24:51 Neno kwa neno: atamkata vipandevipande. Maana yake yawezekana kuwa “atamwadhibu vikali” au “atamtenga mbali.”; #24:51 Taz Mat 8:12 maelezo.]