Dunia kuharibiwa

¹Tazama, Bwana ataifanya dunia kuwa ukiwa

na kuiharibu,

naye atauharibu uso wake

na kutawanya wanaoishi ndani yake:

²ndivyo itakavyokuwa

kwa makuhani na kwa watu,

kwa bwana na kwa mtumishi,

kwa bibi na kwa mjakazi wake,

kwa muuzaji na kwa mnunuzi,

kwa mkopaji na kwa mkopeshaji,

kwa mdaiwa na kwa mdai.

³Dunia itaharibiwa kabisa

na kutekwa nyara kabisa.

Bwana amesema neno hili.

⁴Dunia inakauka na kunyauka,

dunia inanyongʼonyea na kunyauka,

waliotukuzwa wa dunia wananyongʼonyea.

⁵Dunia imetiwa unajisi na watu wake;

wameacha kutii sheria,

wamevunja amri

na kuvunja agano la milele.

⁶Kwa hiyo laana inaiteketeza dunia,

watu wake lazima waichukue hatia yao.

Kwa hiyo wakazi wa dunia wameteketezwa,

nao waliosalia ni wachache sana.

⁷Divai mpya inakauka na mzabibu unanyauka,

watu wote wafurahishao wanalia kwa huzuni.

⁸Furaha ya matoazi imekoma,

kelele za wenye furaha zimekoma,

shangwe za kinubi zimenyamaza.

⁹Hawanywi tena mvinyo pamoja na wimbo,

kileo ni kichungu kwa wanywaji wake.

¹⁰Mji ulioharibiwa umekuwa ukiwa,

mlango wa kila nyumba umefungwa.

¹¹Barabarani wanalilia kupata mvinyo,

furaha yote imegeuka kuwa majonzi,

furaha yote imefukuziwa mbali na dunia.

¹²Mji umeachwa katika uharibifu,

lango lake limevunjwa vipande.

¹³Ndivyo itakavyokuwa duniani

na miongoni mwa mataifa,

kama vile wakati mzeituni upigwavyo,

au kama vile wakati masazo yabakiavyo baada ya zabibu kuvunwa.

¹⁴Wanapaza sauti zao, wanapiga kelele kwa furaha,

kutoka magharibi wanasifu kwa ukelele utukufu wa Bwana .

¹⁵Kwa hiyo upande wa mashariki mpeni Bwana utukufu,

liadhimisheni jina la Bwana , Mungu wa Israeli,

katika visiwa vya bahari.

¹⁶Kutoka miisho ya dunia tunasikia uimbaji:

“Utukufu kwa Yule Mwenye Haki.”

Lakini nilisema, “Ninadhoofika, ninadhoofika!

Ole wangu!

Watenda hila wanasaliti!

Kwa hila watenda hila wanasaliti!”

¹⁷Hofu, shimo na mtego vinakungojea,

ewe mtu ukaaye duniani.

¹⁸Kila akimbiaye asikiapo sauti ya hofu

atatumbukia shimoni,

naye yeyote apandaye kutoka shimoni,

atanaswa kwenye mtego.

Malango ya gharika ya mbinguni yamefunguliwa,

misingi ya dunia inatikisika.

¹⁹Dunia imepasuka,

dunia imechanika,

dunia imetikiswa kabisa.

²⁰Dunia inapepesuka kama mlevi,

inayumbayumba kama kibanda kwenye upepo;

imelemewa sana na mzigo wa hatia ya uasi wake

na ikianguka kamwe haitainuka tena.

²¹Katika siku ile Bwana ataadhibu

mamlaka zilizo juu mbinguni,

na wafalme walio chini duniani.

²²Watakusanywa pamoja

kama wafungwa waliofungwa gerezani;

watafungiwa gerezani

na kuadhibiwa baada ya siku nyingi.

²³Mwezi utatiwa haya, nalo jua litaaibishwa;

kwa maana Bwana wa majeshi atatawala

juu ya Mlima Sayuni na katika Yerusalemu,

tena mbele ya wazee wake, kwa utukufu.