Sofari anasema: Hatia ya Ayubu inastahili adhabu

¹Ndipo Sofari Mnaamathi akajibu:

²“Je, maneno haya yote yapite bila kujibiwa?

Je, huyu mnenaji athibitishwe kuwa na haki?

³Je, maneno yako ya upuzi yawafanye watu wanyamaze kimya?

Je, mtu asikukemee unapofanya dhihaka?

⁴Unamwambia Mungu, ‘Imani yangu ni kamili

nami ni safi mbele zako.’

⁵Aha! Laiti kwamba Mungu angesema,

kwamba angefungua midomo yake dhidi yako,

⁶naye akufunulie siri za hekima,

kwa kuwa hekima ya kweli ina pande mbili.

Ujue hili: Mungu amesahau hata baadhi ya dhambi zako.

⁷“Je, unaweza kujua siri za Mungu?

Je, unaweza kuyachunguza mambo yote kumhusu Mwenyezi?

⁸Ni juu mno kuliko mbingu: unaweza kufanya nini?

Kina chake ni kirefu kuliko Kuzimu:

wewe unaweza kujua nini?

⁹Kipimo chake ni kirefu kuliko dunia,

nacho ni kipana kuliko bahari.

¹⁰“Akija na kukufunga gerezani,

na kuitisha mahakama, ni nani awezaye kumpinga?

¹¹Hakika anawatambua watu wadanganyifu;

naye aonapo uovu, je, haangalii?

¹²Mpumbavu aweza kuwa mwenye hekima,

endapo mtoto wa punda-mwitu atazaliwa mwanadamu.

¹³“Hata sasa ukiutoa moyo wako kwake

na kumwinulia mikono yako,

¹⁴ukiiondolea mbali ile dhambi iliyo mkononi mwako,

wala usiuruhusu uovu ukae kwenye hema lako,

¹⁵ndipo utainua uso wako bila aibu;

utasimama imara bila hofu.

¹⁶Hakika utaisahau taabu yako,

utaikumbuka tu kama maji yaliyokwisha kupita.

¹⁷Maisha yako yatangʼaa kuliko adhuhuri,

nalo giza litakuwa kama alfajiri.

¹⁸Utakuwa salama, kwa kuwa lipo tumaini;

utatazama pande zote na kupumzika kwa salama.

¹⁹Utalala, wala hakuna atakayekuogofya,

naam, wengi watajipendekeza kwako.

²⁰Bali macho ya waovu hayataona,

wokovu utawaepuka;

tarajio lao litakuwa ni hangaiko

la mtu anayekata roho.”