Onyo dhidi ya mwanamke mzinzi

¹Mwanangu, shika maneno yangu

na kuzihifadhi amri zangu ndani yako.

²Shika amri zangu nawe utaishi;

linda mafundisho yangu kama mboni ya jicho lako.

³Yafunge katika vidole vyako;

yaandike katika kibao cha moyo wako.

⁴Mwambie hekima, “Wewe ni dada yangu,”

uite ufahamu jamaa yako;

⁵watakuepusha na mwanamke mzinzi,

kutokana na mwanamke mpotovu

na maneno yake ya kubembeleza.

⁶Kwenye dirisha la nyumba yangu

nilitazama nje kupitia upenyo

kwenye mwimo wa dirisha.

⁷Niliona miongoni mwa wajinga,

nikagundua miongoni mwa wanaume vijana,

kijana asiye na akili.

⁸Alikuwa akishuka njiani karibu na pembe ya kwake,

akielekea kwenye nyumba ya huyo mwanamke

⁹wakati wa machweo, jua likipungua nuru yake,

giza la usiku lilipokuwa likiingia.

¹⁰Ndipo huyo mwanamke akatoka kumlaki,

hali amevaa kama kahaba akiwa na nia ya hila.

¹¹(Ni mwanamke mwenye makelele na mkaidi,

miguu yake haitulii nyumbani;

¹²mara kwenye barabara za mji,

mara kwenye viwanja vikubwa,

kwenye kila pembe huvizia.)

¹³Huyo mwanamke alimkumbatia kijana na kumbusu,

na kwa uso usio na haya akamwambia:

¹⁴“Nina sadaka za amani nyumbani;

leo nimetimiza nadhiri zangu.

¹⁵Kwa hiyo nimetoka nje kukulaki;

nimekutafuta na nimekupata!

¹⁶Nimetandika kitanda changu

kwa kitani za rangi kutoka Misri.

¹⁷Nimetia manukato kitanda changu

kwa manemane, udi na mdalasini.

¹⁸Njoo, tuzame katika mapenzi hadi asubuhi;

tujifurahishe wenyewe kwa mapenzi!

¹⁹Mume wangu hayupo nyumbani;

ameenda safari ya mbali.

²⁰Amechukua mkoba uliojazwa fedha

na hatakuwa nyumbani karibuni.”

²¹Kwa maneno laini yule mwanamke akampotosha;

alimshawishi kwa maneno yake laini.

²²Mara huyo kijana alimfuata yule mwanamke

kama fahali aendaye machinjoni,

kama kulungu aingiaye kwenye kitanzi,

²³hadi mshale umchome ini lake,

kama ndege anayenaswa kwenye mtego,

bila kujua itamgharimu maisha yake.

²⁴Sasa basi wanangu, nisikilizeni;

sikilizeni kwa makini nisemalo.

²⁵Usiruhusu moyo wako ugeukie njia za huyo mwanamke,

wala usitangetange katika mapito yake.

²⁶Aliowaangusha ni wengi;

aliowachinja ni kundi kubwa.

²⁷Nyumba yake ni njia kuu iendayo kaburini,[#7:27 Kaburini hapa maana yake ni Kuzimu ; kwa Kiebrania ni Sheol.]

ielekeayo chini kwenye vyumba vya mauti.