Zaburi 14

Uovu wa wanadamu

¹Mpumbavu anasema moyoni mwake,

“Hakuna Mungu.”

Wamepotoka, matendo yao ni maovu kabisa;

hakuna hata mmoja atendaye mema.

²Bwana anawachungulia wanadamu

kutoka mbinguni

aone kama kuna mwenye hekima,

yeyote anayemtafuta Mungu.

³Wote wamepotoka,

wote wameoza pamoja;

hakuna atendaye mema,

naam, hakuna hata mmoja!

⁴Je, watendao maovu kamwe hawatajifunza:

wale ambao huwala watu wangu

kama watu walavyo mkate,

hao ambao hawamwiti Bwana ?

⁵Wako hapo, wameingiwa na hofu kuu,

maana Mungu yupo pamoja na wenye haki.

⁶Ninyi watenda maovu mnakwamisha mipango ya maskini,

bali Bwana ndiye kimbilio lao.

⁷Laiti wokovu wa Israeli

ungekuja kutoka Sayuni!

Bwana anaporejesha

wafungwa wa watu wake,

Yakobo na ashangilie,

Israeli na afurahi!