Zaburi 144

Mfalme amshukuru Mwenyezi Mungu kwa ushindi

¹Ahimidiwe Mwenyezi Mungu Mwamba wangu,

aifundishaye mikono yangu vita,

na vidole vyangu kupigana.

²Yeye ni Mungu wangu wa upendo na ulinzi wangu,

ngome yangu na mwokozi wangu,

ngao yangu, ninayemkimbilia,

ambaye huwatiisha mataifa chini yangu.

³Ee Mwenyezi Mungu, mwanadamu ni nini hata umjali,

Binadamu ni nini hata umfikirie?

⁴Mwanadamu ni kama pumzi,

siku zake ni kama kivuli kinachopita.

⁵Ee Mwenyezi Mungu, pasua mbingu zako, ushuke,

gusa milima ili itoe moshi.

⁶Peleka umeme uwatawanye adui,

lenga mishale yako uwashinde.

⁷Nyoosha mkono wako kutoka juu,

nikomboe na kuniokoa

kutoka maji makuu,

kutoka mikononi mwa wageni

⁸ambao vinywa vyao vimejaa uongo,

na mikono yao ya kuume ni midanganyifu.

⁹Ee Mungu, nitakuimbia wimbo mpya,

kwa zeze yenye nyuzi kumi nitakuimbia,

¹⁰kwa Yule awapaye wafalme ushindi,

ambaye humwokoa Daudi, mtumishi wake,

kutokana na upanga hatari.

¹¹Nikomboe na uniokoe

kutoka mikononi mwa wageni

ambao vinywa vyao vimejaa uongo,

na mikono yao ya kuume ni midanganyifu.

¹²Kisha wana wetu wakati wa ujana wao

watakuwa kama mimea iliyotunzwa vizuri,

binti zetu watakuwa kama nguzo zilizoviringwa

kurembesha jumba la kifalme.

¹³Ghala zetu zitajazwa

aina zote za mahitaji.

Kondoo wetu watazaa kwa maelfu,

kwa makumi ya maelfu katika mashamba yetu;

¹⁴maksai wetu watakokota

mizigo mizito.

Hakutakuwa na kubomoka kuta,

hakuna kuchukuliwa mateka,

wala kilio cha taabu

katika barabara zetu.

¹⁵Heri watu ambao hili ni kweli;

heri wale ambao Mwenyezi Mungu ni Mungu wao.