Zaburi 17

Sala ya mtu asiye na hatia

¹Sikia, Ee Bwana , kusihi kwangu kwa haki,

sikiliza kilio changu.

Tega sikio kwa ombi langu,

halitoki katika midomo ya udanganyifu.

²Hukumu yangu na itoke kwako,

macho yako na yaone yale yaliyo haki.

³Ingawa unauchunguza moyo wangu na kunikagua usiku,

ingawa umenijaribu, hutaona chochote.

Nimeamua kwamba kinywa changu

hakitatenda dhambi.

⁴Kuhusu matendo ya wanadamu:

kwa neno la midomo yako,

nimejiepusha na njia za wenye jeuri.

⁵Hatua zangu zimeshikamana na njia zako;

nyayo zangu hazikuteleza.

⁶Ee Mungu, ninakuita, kwa kuwa utanijibu,

nitegee sikio lako na usikie ombi langu.

⁷Uoneshe ajabu ya upendo wako mkuu,

wewe unayeokoa kwa mkono wako wa kuume

wale wanaokukimbilia kutokana na adui zao.

⁸Nilinde kama mboni ya jicho lako,

unifiche chini ya kivuli cha mabawa yako

⁹kutokana na waovu wanaonishambulia,

kutokana na adui wauaji wanaonizunguka.

¹⁰Huifunga mioyo yao iliyo migumu,

vinywa vyao hunena kwa majivuno.

¹¹Wamenifuatia nyayo zangu, sasa wamenizingira,

wakiwa macho, waniangushe chini.

¹²Wamefanana na simba mwenye njaa anayewinda,

kama simba mkubwa anayenyemelea mafichoni.

¹³Inuka, Ee Bwana , pambana nao, uwaangushe,

niokoe kwa upanga wako kutoka kwa waovu.

¹⁴Ee Bwana , mkono wako uniokoe na watu kama hawa,

kutokana na watu wa ulimwengu huu

ambao fungu lao liko katika maisha haya.

Na wapate adhabu ya kuwatosha.

Watoto wao na wapate zaidi ya hayo,

hukumu na iendelee kwa watoto wa watoto wao.

¹⁵Bali mimi nitauona uso wako katika haki;

niamkapo, nitaridhika kwa kuona sura yako.