Zaburi 22

Kilio cha uchungu na wimbo wa sifa

¹Mungu wangu, Mungu wangu, mbona umeniacha?

Kwa nini uko mbali hivyo kuniokoa?

Mbali hivyo na maneno ya kuugua kwangu?

²Ee Mungu wangu, ninalia mchana, lakini hunijibu,

hata usiku, sinyamazi.

³Hata hivyo umesimikwa kwenye kiti cha enzi,

Wewe Uliye Mtakatifu;

wewe ni sifa ya Israeli.

⁴Kwako wewe baba zetu waliweka tumaini lao,

walikutumaini nawe ukawaokoa.

⁵Walikulilia wewe na ukawaokoa,

walikutegemea wewe nao hawakuaibika.

⁶Mimi ni mnyoo wala si mwanadamu,

wanaume wamenibeza, na watu wamenidharau.

⁷Wote wanaoniona wananidhihaki;

wananivurumishia matusi, wakitikisa vichwa vyao:

⁸Wanasema, “Amtegemea Bwana ,

basi Bwana na amwokoe.

Amkomboe basi, kwa maana

anapendezwa naye.”

⁹Hata hivyo ulinitoa tumboni,

ukanifanya nikutegemee,

hata nilipokuwa ninanyonya

matiti ya mama yangu.

¹⁰Nimekabidhiwa kwako tangu kuzaliwa,

toka tumboni mwa mama yangu

umekuwa Mungu wangu.

¹¹Usiwe mbali nami,

kwa maana shida iko karibu

na hakuna wa kunisaidia.

¹²Mafahali wengi wamenizunguka,

mafahali wa Bashani wenye nguvu

wamenizingira.

¹³Simba wanaonguruma na kurarua mawindo

wanapanua vinywa vyao dhidi yangu.

¹⁴Nimemiminwa kama maji,

mifupa yangu yote imeteguka viungoni.

Moyo wangu umegeuka kuwa nta,

umeyeyuka ndani yangu.

¹⁵Nguvu zangu zimekauka kama kigae,

ulimi wangu umegandamana

na kaakaa la kinywa changu,

kwa sababu umenilaza

katika mavumbi ya kifo.

¹⁶Mbwa wamenizunguka,

kundi la watu waovu limenizingira;

wamenidunga mikono na miguu.

¹⁷Naweza kuhesabu mifupa yangu yote,

watu wananikodolea macho na kunisimanga.

¹⁸Wanagawana nguo zangu,

na vazi langu wanalipigia kura.

¹⁹Lakini wewe, Ee Bwana ,

usiwe mbali.

Ee Nguvu yangu,

uje haraka unisaidie.

²⁰Okoa maisha yangu na upanga,

uhai wangu wa thamani kutoka nguvu za mbwa.

²¹Niokoe kutoka kinywani mwa simba,

niokoe kutoka pembe za nyati.

²²Nitalitangaza jina lako kwa ndugu zangu,

katika kusanyiko nitakusifu wewe.

²³Ninyi ambao mnamcha Bwana , msifuni!

Ninyi nyote wazao wa Yakobo, mheshimuni yeye!

Mcheni yeye, ninyi wazao wa Israeli!

²⁴Kwa maana hakupuuza wala kudharau

mateso ya aliyeteswa;

hakumficha uso wake

bali alisikiliza kilio chake.

²⁵Kwako wewe hutoka kiini cha sifa zangu katika kusanyiko kubwa,

nitatimiza nadhiri zangu mbele ya wale wanaokucha wewe.

²⁶Maskini watakula na kushiba,

wale wanaomtafuta Bwana watamsifu:

mioyo yenu na iishi milele!

²⁷Miisho yote ya dunia itakumbuka

na kumgeukia Bwana ,

nazo jamaa zote za mataifa

zitasujudu mbele zake,

²⁸kwa maana ufalme ni wa Bwana

naye huyatawala mataifa.

²⁹Matajiri wote wa dunia watasherehekea na kuabudu.

Wote wanaoshuka mavumbini

watapiga magoti mbele yake,

wote ambao hawawezi

kudumisha uhai wao.

³⁰Wazao wa baadaye watamtumikia yeye;

vizazi vijavyo vitajulishwa habari za Bwana.

³¹Watatangaza haki yake kwa watu

ambao hawajazaliwa bado,

kwa maana yeye ametenda hili.