Zaburi 32

Furaha ya msamaha

¹Heri mtu aliyesamehewa makosa yake,

ambaye dhambi zake zimefunikwa.

²Heri mtu yule ambaye Bwana

hamhesabii dhambi,

na ambaye rohoni mwake

hamna udanganyifu.

³Niliponyamaza, mifupa yangu ilichakaa

kwa kulia kwa maumivu makali mchana kutwa.

⁴Usiku na mchana

mkono wako ulinilemea,

nguvu zangu zilinyonywa

kama vile katika joto la kiangazi.

⁵Kisha nikakiri dhambi yangu kwako,

wala sikuficha uovu wangu.

Nilisema, “Nitaungama

makosa yangu kwa Bwana .”

Ndipo uliponisamehe

hatia ya dhambi yangu.

⁶Kwa hiyo kila mtu mcha Mungu akuombe

wakati unapopatikana,

hakika maji makuu yatakapofurika

hayatamfikia yeye.

⁷Wewe ndiwe mahali pangu pa kujificha,

utaniepusha na taabu

na kunizunguka kwa nyimbo za wokovu.

⁸Nitakufundisha na kukuonesha njia utakayoiendea;

nitakushauri na kukuangalia.

⁹Usiwe kama farasi au nyumbu

wasio na akili,

ambao ni lazima waongozwe kwa lijamu na hatamu

la sivyo hawatakukaribia.

¹⁰Mtu mwovu ana taabu nyingi,

bali upendo usio na kikomo wa Bwana

unamzunguka mtu anayemtumaini.

¹¹Shangilieni katika Bwana na mfurahi, enyi wenye haki!

Imbeni, nyote mlio wanyofu wa moyo!