Zaburi 34

Sifa na wema wa Mungu

¹Nitamtukuza Bwana nyakati zote,

sifa zake zitakuwa mdomoni mwangu siku zote.

²Nafsi yangu itajisifu katika Bwana ,

walioonewa watasikia na wafurahi.

³Mtukuzeni Bwana pamoja nami,

naam, na tulitukuze jina lake pamoja.

⁴Nilimtafuta Bwana naye akanijibu,

akaniokoa kwenye hofu zangu zote.

⁵Wale wamtazamao hutiwa nuru,

nyuso zao hazifunikwi na aibu kamwe.

⁶Maskini huyu alimwita Bwana , naye akamsikia,

akamwokoa katika taabu zake zote.

⁷Malaika wa Bwana hufanya kituo

akiwazunguka wale wamchao,

naye huwaokoa.

⁸Onjeni mwone kwamba Bwana ni mwema;

heri mtu yule anayemkimbilia.

⁹Mcheni Bwana enyi watakatifu wake,

kwa maana wale wamchao

hawapungukiwi na chochote.

¹⁰Wana simba wenye nguvu

hutindikiwa na kuona njaa,

bali wale wanaomtafuta Bwana

hawatakosa kitu chochote kilicho chema.

¹¹Njooni, watoto wangu, mnisikilize,

nitawafundisha kumcha Bwana .

¹²Yeyote kati yenu anayependa uzima

na kutamani kuziona siku nyingi njema,

¹³basi auzuie ulimi wake na mabaya,

na midomo yake kutokana na kusema uongo.

¹⁴Aache uovu, atende mema,

aitafute amani na kuifuatilia.

¹⁵Macho ya Bwana huwaelekea wenye haki,

na masikio yake yako makini kusikiliza kilio chao.

¹⁶Uso wa Bwana uko kinyume na watendao maovu,

ili kufuta kumbukumbu lao duniani.

¹⁷Wenye haki hulia, naye Bwana huwasikia,

huwaokoa katika taabu zao zote.

¹⁸Bwana yu karibu na waliovunjika moyo,

na huwaokoa waliopondeka roho.

¹⁹Mwenye haki ana mateso mengi,

lakini Bwana humwokoa nayo yote,

²⁰huhifadhi mifupa yake yote,

hata mmoja hautavunjika.

²¹Ubaya utamuua mtu mwovu,

nao adui za mwenye haki watahukumiwa.

²²Bwana huwakomboa watumishi wake,

yeyote anayemkimbilia yeye

hatahukumiwa kamwe.