Zaburi 37

Mwisho wa mwovu na urithi wa mwenye haki

¹Usisumbuke kwa ajili ya watendao maovu,

wala usiwaonee wivu watendao mabaya,

²kwa maana watanyauka upesi kama majani,

watakufa upesi kama mimea ya kijani.

³Mtumaini Bwana na utende yaliyo mema.

Kaa katika nchi ukafurahie malisho salama.

⁴Jifurahishe katika Bwana

naye atakupa haja za moyo wako.

⁵Mkabidhi Bwana njia yako,

mtumaini yeye, naye atatenda hili:

⁶Yeye atafanya haki yako ingʼae kama mapambazuko,

na hukumu ya shauri lako kama jua la adhuhuri.

⁷Tulia mbele za Bwana

na umngojee kwa uvumilivu;

usisumbuke watu wanapofanikiwa katika njia zao,

wanapotekeleza mipango yao miovu.

⁸Epuka hasira na uache ghadhabu;

usihangaike: itakuongoza tu kutenda uovu.

⁹Kwa maana waovu watakatiliwa mbali,

bali wale wanaomtumaini Bwana watairithi nchi.

¹⁰Bado kitambo kidogo, nao waovu hawataonekana,

ingawa utawatafuta, hawataonekana.

¹¹Bali wanyenyekevu watairithi nchi

na wafurahie amani tele.

¹²Waovu hula njama dhidi ya wenye haki

na kuwasagia meno,

¹³bali Bwana huwacheka waovu,

kwa sababu anajua siku yao inakuja.

¹⁴Waovu hufuta upanga

na kupinda upinde,

ili wawaangushe maskini na wahitaji,

kuwaua wale ambao njia zao ni nyofu.

¹⁵Lakini panga zao zitachoma mioyo yao wenyewe,

na pinde zao zitavunjwa.

¹⁶Bora kidogo walicho nacho wenye haki

kuliko wingi wa mali ya waovu wengi;

¹⁷kwa maana nguvu za waovu zitavunjwa,

lakini Bwana humtegemeza mwenye haki.

¹⁸Bwana anazifahamu siku za wanyofu,

na urithi wao utadumu milele.

¹⁹Siku za maafa hawatanyauka,

siku za njaa watafurahia wingi wa vitu.

²⁰Lakini waovu wataangamia:

Adui za Bwana watakuwa

kama uzuri wa mashamba,

watatoweka,

watatoweka kama moshi.

²¹Waovu hukopa na hawalipi,

bali wenye haki hutoa kwa ukarimu.

²²Wale wanaobarikiwa na Bwana watairithi nchi,

bali wale anaowalaani watakatiliwa mbali.

²³Kama Bwana akipendezwa na njia ya mtu,

yeye huimarisha hatua zake,

²⁴ajapojikwaa, hataanguka,

kwa maana Bwana

humtegemeza kwa mkono wake.

²⁵Nilikuwa kijana na sasa ni mzee,

lakini sijaona kamwe wenye haki wameachwa

au watoto wao wakiombaomba chakula.

²⁶Wakati wote ni wakarimu na hukopesha bila masharti.

Watoto wao watabarikiwa.

²⁷Acha ubaya na utende wema,

nawe utaishi katika nchi milele.

²⁸Kwa kuwa Bwana huwapenda wenye haki

naye hatawaacha waaminifu wake.

Watalindwa milele,

lakini uzao wa waovu utakatiliwa mbali.

²⁹Wenye haki watairithi nchi,

na kuishi humo milele.

³⁰Kinywa cha mwenye haki hutamka hekima,

nao ulimi wake huzungumza lililo haki.

³¹Sheria ya Mungu wake imo moyoni mwake;

nyayo zake hazitelezi.

³²Watu waovu huvizia wenye haki,

wakitafuta kuwaua;

³³lakini Bwana hatawaacha mikononi mwao

wala hatawaacha wahukumiwe

kuwa wakosa wanaposhtakiwa.

³⁴Mngojee Bwana ,

na uishike njia yake.

Naye atakutukuza uirithi nchi,

waovu watakapokatiliwa mbali,

utaliona hilo.

³⁵Nimemwona mtu mwovu na mkatili akistawi

kama mwerezi wa Lebanoni,

³⁶lakini alitoweka upesi na hakuonekana,

ingawa nilimtafuta, hakupatikana.

³⁷Watafakari watu wasio na hatia,

wachunguze watu wakamilifu,

kuna mafanikio kwa mtu apendaye amani.

³⁸Lakini watenda dhambi wote wataangamizwa,

mafanikio yao yatakatiliwa mbali.

³⁹Wokovu wa wenye haki hutoka kwa Bwana ,

yeye ni ngome yao wakati wa shida.

⁴⁰Bwana huwasaidia na kuwaokoa,

huwaokoa kutoka kwa waovu na kuwahifadhi,

kwa maana wanamkimbilia.