1 Mambo 10

Kufa kwake Sauli.

¹Wafilisti walipopigana nao Waisiraeli, watu wa Isiraeli wakawakimbia Wafilisti kwa madonda waliyopigwa, wakaanguka, wakafa kule mlimani kwa Gilboa.

²Wafilisti wakawafuata na kuandamana na Sauli na wanawe, Wafilisti wakawaua wana wa Sauli: Yonatani na Abinadabu na Malkisua.

³Mapigano yakawa makali hapo, Sauli alipokuwa; wapiga mishale walipomwona, akaumizwa nao wapiga mishale.

⁴Ndipo, Sauli alipomwambia mchukua mata yake: Uchomoe upanga wako, unichome nao, hao wasiotahiriwa wasije kunichezea vibaya! Mchukua mata yake alipokataa kwa kuogopa sana, Sauli akausimika upanga, akauangukia.

⁵Mchukua mata yake alipoona, ya kuwa Sauli amekufa, naye akauangukia upanga wake, akafa.

⁶Ndivyo, Sauli alivyokufa na wanawe watatu, nao wa mlango wake wote wakafa pamoja naye.

⁷Watu wote wa Isiraeli waliokaa kule katika mbuga ya bondeni walipoona, ya kuwa wamekimbizwa, ya kuwa Sauli na wanawe wamekufa, wakaiacha miji yao wakakimbia nao; kisha Wafilisti wakaja, wakakaa humo.

⁸Ikawa kesho yake, Wafilisti walipokuja kuwapambua waliouawa, wakamwona Sauli na wanawe, jinsi walivyokufa mlimani kwa Gilboa.

⁹Wakampambua, wakakichukua kichwa chake na mata yake, wakatuma wajumbe kwenda po pote katika nchi ya Wafilisti kuyatangaza penye vinyago vyao, hata kwa watu.

¹⁰Mata yake wakayaweka nyumbani mwa mungu wao, nacho kichwa chake wakakiangika kwa misumari nyumbani mwa Dagoni.

¹¹Watu wote wa Yabesi wa Gileadi walipoyasikia yote, Wafilisti waliyomfanyizia Sauli,

¹²wakaondoka watu wote walioweza kupiga vita, wakauchukua mzoga wa Sauli, nayo mizoga ya wanawe, wakaipeleka Yabesi, wakaizika mifupa yao chini ya mkwaju kwao Yabesi, wakafunga mfungo siku saba.[#2 Sam. 2:5.]

¹³Ndivyo, Sauli alivyokufa kwa kumvunjia Bwana maagano, aliyoyafanya naye, kwa kuwa hakulishika Neno la Bwana, tena kwa kuwa alitafuta mwaguaji aliyejua kukweza mizimu.[#1 Sam. 15:11; 28:8.]

¹⁴Kwa kuwa hakutaka kuongozwa na Bwana, akamwua, nao ufalme akauondoa kwake, akampa Dawidi, mwana wa Isai.