Kugeuka sura

¹Na baada ya siku sita Yesu akawatwaa Petro, na Yakobo, na Yohana nduguye, akawaleta juu ya mlima mrefu faraghani;[#2 Pet 1:17-18]

²akageuka sura yake mbele yao; uso wake ukang'aa kama jua, mavazi yake yakawa meupe kama nuru.[#2 Pet 1:16-18]

³Na tazama, wakatokewa na Musa na Eliya, wakizungumza naye.

⁴Petro akajibu akamwambia Yesu, Bwana, ni vizuri sisi kuwapo hapa; ukitaka, nitafanya hapa vibanda vitatu, kimoja chako wewe, na kimoja cha Musa, na kimoja cha Eliya.

⁵Alipokuwa bado akisema, tazama, wingu jeupe likawatia uvuli; na tazama, sauti ikatoka katika lile wingu, ikasema, Huyu ni Mwanangu, mpendwa wangu, ninayependezwa naye; msikieni yeye.[#Mwa 22:2; Kum 18:15; Zab 2:7; Isa 42:1; Mt 3:17; 12:18; Mk 1:11; Lk 3:22]

⁶Na wale wanafunzi waliposikia, walianguka kifudifudi na kuogopa sana.

⁷Yesu akaja, akawagusa, akasema, Inukeni, wala msiogope.

⁸Wakainua macho yao, wasione mtu ila Yesu peke yake.

⁹Na walipokuwa wakishuka mlimani, Yesu aliwaagiza, akasema, Msimwambie mtu yeyote habari ya maono hayo, hadi Mwana wa Adamu atakapofufuka katika wafu.[#Mt 16:20]

¹⁰Wanafunzi wake wakamwuliza, wakisema, Basi kwa nini waandishi hunena ya kwamba imempasa Eliya kuja kwanza?[#Mal 4:5; Mt 11:14]

¹¹Naye akajibu, akawaambia, Kweli Eliya yuaja kwanza, naye atatengeneza yote,

¹²ila nawaambia, ya kwamba Eliya amekwisha kuja, wasimtambue, lakini wakamtenda yote waliyotaka. Vivyo hivyo Mwana wa Adamu naye yuaenda kuteswa kwao.[#Mt 11:14; 14:9,10]

¹³Ndipo wale wanafunzi walipofahamu ya kuwa amesema nao habari za Yohana Mbatizaji.[#Lk 1:17]

Yesu aponya mvulana mwenye pepo

¹⁴Nao walipoufikia mkutano, mtu mmoja akamjia, akampigia magoti, akisema,[#Mk 9:14-29; Lk 9:37-42]

¹⁵Bwana, umrehemu mwanangu, kwa kuwa ana kifafa, na kuteswa vibaya; maana mara nyingi huanguka motoni, na mara nyingi majini.

¹⁶Nilimleta kwa wanafunzi wako, wasiweze kumponya.

¹⁷Yesu akajibu, akasema, Enyi kizazi kisichoamini, kilichopotoka, nitakaa pamoja nanyi hadi lini? Nitachukuliana nanyi hadi lini? Mleteni huku kwangu.[#Kum 32:5; Yn 14:9]

¹⁸Yesu akamkemea pepo, naye akamtoka; yule mvulana akapona tangu saa ile.

¹⁹Kisha wale wanafunzi wakamwendea Yesu kwa faragha wakasema Mbona sisi hatukuweza kumtoa?[#Mt 10:1]

²⁰Yesu akawaambia, Kwa sababu ya upungufu wa imani yenu. Kwa maana, amin, nawaambia, Mkiwa na imani kiasi cha punje ya haradali mtauambia mlima huu, Ondoka hapa uende kule; nao utaondoka; wala halitakuwako neno lisilowezekana kwenu. [[#Mt 21:21; Mk 11:23; 1 Kor 13:2; Lk 17:6]

²¹Lakini namna hii haitoki ila kwa kusali na kufunga.]

Yesu asema tena juu ya kufa na kufufuka kwake

²²Nao walipokuwa wakikaa Galilaya, Yesu akawaambia, Mwana wa Adamu anakwenda kutiwa katika mikono ya watu, nao watamwua, na siku ya tatu atafufuka.[#Mk 9:30-32; Lk 9:43-45; #Mt 16:21]

²³Wakasikitika sana.

Yesu na ushuru wa hekalu

²⁴Na walipofika Kapernaumu, wale watozao nusu-shekeli walimwendea Petro, wakasema, Je! Mwalimu wenu hatoi ushuru wa hekalu? Akasema, Hutoa.[#Kut 30:13; 38:26; #17:24 yaani nusu shekeli.]

²⁵Naye alipoingia nyumbani, Yesu alitangulia kumwuliza, akisema, Waonaje, Simoni? Wafalme wa dunia hutwaa kodi ama ushuru kwa watu gani? Kwa wana wao au kwa wageni?

²⁶Naye aliposema, Kwa wageni, Yesu alimwambia, Basi, kama ni hivyo, wana wako huru.

²⁷Lakini tusije tukawakwaza, nenda baharini ukatupe ndoana, ukatwae samaki yule azukaye kwanza; na ukifumbua mdomo wake utaona shekeli; ichukue hiyo ukawape kwa ajili yangu na kwa ajili yako.[#17:27 Shekeli moja ni kama shilingi 3.]