Ndoto Hazimaanishi kitu

¹Mwenye kuufuata ubatili ataona udanganyifu; na ndoto huwapa wapumbavu mabawa.[#Kum 13:1-5; 18:9-14]

²Mithili ya yule akamataye kivuli, au kuufuata upepo, ndivyo alivyo mtu anayetumainia ndoto.

³Maono ya ndoto ni kama lila na fila; kama mlingano wa uso wako na uso wenyewe.

⁴Katika kitu kichafu kipande gani kitakuwa safi? Na katika uongo sehemu gani ni kweli?

⁵Maaguzi, na ndege, na ndoto, ni ubatili; na kwa hayo moyo wa mtu una mauzauza, kama mwanamke wakati wa uchungu.

⁶Zisipoletwa naye Aliye Juu katika majilio yake, usiziangalie moyoni.

⁷Kwa maana ndoto zimewadanganya wengi, nao wamebatilishwa matumaini yao.

⁸Pasipokuwapo uongo torati itatekelezwa;

Kinywani mwa mwaminifu hekima hukamilika.

Uzoefu kama Msafiri

⁹Mtu mwelekevu huyatafuta mambo yote, na yeye aliyeona mengi atauhubiri ufahamu wake.

¹⁰Asiye mwelekevu ajua machache; lakini aliyesafiri ataongeza werevu wake.

¹¹Katika kusafiri kwangu mimi mwenyewe nimeona mambo mengi, hata ufahamu wangu unaweza kupita niwezavyo kusema.

¹²Tena mara nyingi nimeona hatari, hata ya kufa; lakini kwa sababu ya hayo nikapona.

¹³Roho zao wamchao BWANA wataishi;

Maana taraja lao lina Yeye awaokoaye.

Mcheni Bwana

¹⁴Amchaye BWANA haoni hofu wala hafanyi woga;

Maana Yeye ndiye aliye tumaini lake.

¹⁵Amebarikiwa roho yule amchaye BWANA;

Amtazamaye ni nani, na nguzo yake ni nini?

¹⁶Macho ya BWANA yawaelekea wampendao;

Ngao yenye nguvu na nguzo thabiti,

Kifuniko wakati wa joto na jua kichwani,

Huwalinda wasijikwae, huwasaidia wasianguke.

¹⁷Huihuisha roho, huyaangaza macho,

Hutoa afya, na uzima, na baraka.

Dhabihu na Matoleo

¹⁸Mtu atoaye sadaka kitu kilichopatikana kwa udhalimu, sadaka yake imetolewa kwa dhihaka, wala dhihaka za wasio haki hazipati kibali.

¹⁹Yeye Aliye Juu hapendezwi na sadaka za waovu, wala Yeye haridhii dhambi kwa ajili ya wingi wa kafara.

Dhabihu Zitolewazo

²⁰Yeyote aletaye mali za maskini ziwe sadaka, mfano wake ni mtu amchinjaye mwana mbele ya macho ya babaye.

²¹Riziki ya wahitaji ndiyo uzima wake maskini, na mwenye kumnyima ni mtu wa damu.

²²Amnyang'anyaye jirani yake riziki yake ni mmwaga damu, naye amnyimaye mtumishi mshahara wake ni mwuaji.

²³Iwapo mtu mmoja anajenga, mwenzake akabomoa, je! Faida yao ni nini ila kazi bure tu?

²⁴Iwapo mtu mmoja anaomba, na mwingine analaani, je! BWANA ataisikia sauti ya yupi?

²⁵Mwenye kutawadha baada ya kugusa maiti akaigusa tena, kule kutawadha kwake kwafaa nini?

²⁶Kadhalika mtu afungaye kwa sababu ya dhambi zake, akaenda akazifanya zizo hizo tena, ni nani atakayeisikiliza sala yake, ama kujinyenyekeza kwake kutamfaidia nini?