NYONGEZA

Sala ya Yoshua Mwana wa Sira

¹Ee BWANA, Mfalme wangu, nitakushukuru; Ee Mungu wa wokovu wangu, nitakuhimidi.

²Nami nitalitangaza jina lako Wewe uliye nguvu za uhai wangu. Kwa maana umeikomboa roho yangu na mauti, ukauzuia mwili wangu usishuke shimoni, ukaiokoa miguu yangu na uwezo wa kuzimu. Ukaniponya na masingizio ya watu katika mapigo ya ulimi usengenyao, na midomo yao wanaogeukia uongo.

³Ulikuwa upande wangu juu yao walioniondokea. Ukaniokoa, kwa kadiri ya wingi wa rehema zako, katika mtego wao waliokutazamia kuanguka kwangu, katika mikono yao waliotafuta maisha yangu; na katika mateso mengi umeniponya.

⁴Ukaniokoa na moto ulionisonga pande zote, yaani, katikati ya moto nisiouwasha mimi.

⁵Ukaniokoa katika vilindi vya kuzimu, na midomo itungayo madhara na kuzua maneno ya uongo, mishale ya ulimi wenye hila.

⁶Nami, roho yangu ilikaribia mauti, na maisha yangu yakawa karibu na kuzimu.

⁷Nikageukia pande zote, wala hakuna wa kunisaidia. Nilikuwa nikimtazamia mtu atakayenitegemeza, wala hakuna.

⁸Ndipo nilipozikumbuka fadhili za BWANA na rehema zake, na matendo yake yaliyokuwapo tangu milele; ambaye huwaokoa wamngojao, na kuwaponya katika mabaya yote.

⁹Hivyo nikaiinua dua yangu kutoka nchi, nikamlilia kutoka malangoni mwa kuzimu.

¹⁰Nilimwita BWANA, Wewe, Baba yangu,

Mwenye amri ya wokovu wangu,

Usiniache siku ya msiba wangu,

Katika siku ya uharibifu na ukiwa.

Nami nitalihimidi Jina lako daima,

Na kukukumbuka kwa shukrani.

¹¹Ndipo BWANA alipoisikia sauti yangu, akaisikiliza dua yangu; akanikomboa katika mabaya yote, akaniokoa katika siku ya taabu.

¹²Kwa hiyo nitamshukuru na kumsifu, na kulihimidi Jina la BWANA.

Mashairi juu ya kuitafuta hekima

¹³Mimi nilipokuwa kijana, kabla sijasafiri bado, niliitafuta hekima kwa bidii katika sala yangu,

¹⁴na mbele ya hekalu nikaomba, nami hata mwisho nitazidi kuitafuta.

¹⁵Ikachanua kama zabibu inavyoiva, na moyo wangu ukapendezwa, na mguu wangu ukaenda katika njia iliyo sawa. Tangu ujana wangu nikafanya kuaua,

¹⁶nikaliinamisha sikio kidogo, nikaipokea, nikajipatia mafundisho tele.

¹⁷Kwangu nira yake ikawa utukufu, nami nitamshukuru Yeye aliyenifundisha.

¹⁸Kwa maana nilikusudia kujizoeza nayo, nikajitahidi katika yaliyo mema, wala sitatahayarishwa.

¹⁹Roho yangu imeshindana kwa nguvu ndani yake, na kuhusu kutenda kwangu nilikuwa mwangalifu; nikainyosha mikono yangu juu mbinguni, nikaulalamikia ujinga wangu.

²⁰Nikaielekeza roho yangu moja kwa moja kwake, na katika unyofu nikaiona; tangu mwanzo nikajipatia ufahamu, na kwa hiyo sitakataliwa milele.

²¹Nao mtima wangu ukatamani kuitazama, kwa hiyo nimeipata kama tunu.

²²Naye BWANA akanipa thawabu ya usemaji, basi kwa midomo yangu nitamhimidi.

²³Enyi wajinga, mnikaribie, na kutua katika nyumba yangu ya mafundisho.

²⁴Ya nini kupungukiwa na hayo, na roho zenu kuona kiu?

²⁵Nimefumbua kinywa changu kusema, Jipatieni hekima pasipo fedha,

²⁶jitieni shingo zenu chini ya nira yake, roho zenu ziuchukue mzigo wake; mradi ni karibu nao waitafutao.

²⁷Tazameni kwa macho yenu kwamba mimi nilifanya kazi kitambo, na kujipatia wingi wa raha.

²⁸Sikilizeni mafundisho yangu ingawa ni machache, na kwa hayo mtapata thawabu kama dhahabu.

²⁹Roho zenu na ziifurahie rehema ya Mungu, wala hamtatahayarika katika kumsifu.

³⁰Fanyeni kazi zenu kabla haujaja muhula, na wakati wake BWANA atawajazi.