1 Mga Hari 1

Ang mga Huling Araw ni Haring David

¹Matandang-matanda na si Haring David at kahit kumutan pa siya ng makapal ay giniginaw pa rin siya.

²Kaya sinabi ng kanyang mga lingkod, “Mahal na Hari, payagan nʼyo po kaming maghanap ng isang dalagita na mag-aalaga sa inyo. Tatabihan po niya kayo para hindi kayo ginawin.”

³Kaya naghanap sila ng magandang dalagita sa buong Israel, at nakita nila si Abisag na taga-Shunem, at dinala nila siya sa hari.

⁴Talagang maganda si Abisag at naging tagapag-alaga siya ng hari. Pero hindi sumiping ang hari sa kanya.

Gusto ni Adonias na Maging Hari

⁵Ngayon, si Adonias na anak ni David kay Haguit ay nagmamayabang na siya ang susunod na magiging hari. Kaya naghanda siya ng mga karwahe at mga kabayo at limampung sundalo na mauuna sa kanya.[#1:5 : O mga mangangarwahe.]

⁶Hindi siya kailanman pinakialaman ng kanyang amang si David, at hindi sinaway sa kanyang mga ginagawa. Napakaguwapong lalaki ni Adonias at ipinanganak siyang kasunod ni Absalom.

⁷Nakipag-usap siya kay Joab na anak ni Zeruias at sa paring si Abiatar tungkol sa balak niyang maging hari, at pumayag ang dalawa na tumulong sa kanya.

⁸Ngunit hindi pumanig sa kanya ang paring si Sadoc at ang propetang si Natan, pati si Benaias na anak ni Jehoiada, gayon din sina Simei at Rei at ang magigiting na bantay ni David.

⁹Isang araw, pumunta si Adonias sa Bato ng Zohelet malapit sa En-rogel at naghandog siya roon ng mga tupa, mga baka, at mga pinatabang guya. Inimbita niya ang halos lahat ng kapatid niyang lalaki kay Haring David at ang halos lahat ng pinuno ng Juda.

¹⁰Pero hindi niya inimbita ang propetang si Natan, si Benaias, ang magigiting na bantay ng hari at si Solomon na kanyang kapatid.

¹¹Pumunta si Natan kay Batsheba na ina ni Solomon, at nagtanong, “Hindi mo ba alam na ang anak ni Haguit na si Adonias ay ginawang hari ang sarili at hindi ito alam ni Haring David?

¹²Kung gusto mong maligtas ang buhay mo at ang buhay ng anak mong si Solomon, sundin mo ang payo ko.

¹³Puntahan mo si Haring David at sabihin mo sa kanya, ‘Mahal na Hari, hindi po baʼt nangako kayo sa akin na ang anak nating anak na si Solomon ang papalit sa inyo bilang hari? Bakit si Adonias po ang naging hari?’[#1:13 : Sa literal, kong. Ganito rin sa talata 17|1KI 1:17.]

¹⁴At habang nakikipag-usap ka sa hari, papasok ako at patutunayan ko ang iyong sinasabi.”

¹⁵Kaya nagpunta si Batsheba sa kuwarto ng hari. Matanda na talaga ang hari at si Abisag na taga-Shunem ang nag-aalaga sa kanya.

¹⁶Yumukod si Batsheba at lumuhod sa harapan ng hari. Tinanong siya ng hari, “Ano ang kailangan mo?”

¹⁷Sumagot si Batsheba, “Mahal na Hari, nangako po kayo sa akin sa pangalan ng Panginoon na inyong Diyos, na ang anak nating si Solomon ang papalit sa inyo bilang hari.

¹⁸Ngunit ipinalagay ni Adonias na siya na ang hari ngayon, at hindi mo ito alam.

¹⁹Naghandog siya ng maraming torong baka, mga pinatabang guya at mga tupa. Inanyayahan niya ang lahat ng anak ninyong lalaki, maliban kay Solomon na iyong lingkod. Inanyayahan din niya ang paring si Abiatar at si Joab na kumander ng inyong mga sundalo.

²⁰Ngayon, Mahal na Hari, naghihintay po ang mga Israelita sa inyong pasya kung sino po ang papalit sa inyo bilang hari.

²¹Kung hindi kayo magpapasya, mahal na hari, ako at ang anak nating si Solomon ay ituturing na kriminal kapag wala ka na.”

²²Habang nakikipag-usap si Batsheba sa hari, dumating ang propetang si Natan.

²³Pumunta sa silid ng hari ang kanyang lingkod at sinabi na dumating si Natan at nais siyang makausap, kaya ipinatawag siya ng hari.

Pagpasok ni Natan nagpatirapa siya sa harapan ng hari,

²⁴at sinabi, “Mahal na Hari, sinabi po ba ninyong si Adonias ang siyang papalit sa inyo bilang hari?

²⁵Ngayong araw na ito, naghandog siya ng maraming toro, pinatabang guya at mga tupa. At inimbita niya ang halos lahat ng inyong anak na lalaki, ang kumander ng iyong mga sundalo at ang paring si Abiatar. Ngayoʼy kumakain at nag-iinuman sila at nagsasabi, ‘Mabuhay si Haring Adonias!’

²⁶Pero ako na inyong lingkod ay hindi niya inimbita, pati na rin ang paring si Sadoc, si Benaias na anak ni Jehoiada at si Solomon na inyong lingkod.

²⁷Ito po ba ang pasya ninyo, Mahal na Hari, na hindi nʼyo na ipinaalam sa amin kung sino ang papalit sa inyo bilang hari?”

Hinirang ni David si Solomon Bilang Hari

²⁸Sinabi ni Haring David, “Sabihan mo si Batsheba na pumunta rito.” Kaya pumunta si Batsheba sa hari.

²⁹Pagkatapos, sumumpa si Haring David, “Sumusumpa ako sa buháy na Panginoon , na nagligtas sa akin sa lahat ng kapahamakan,

³⁰na tutuparin ko ngayon ang pangako ko sa iyo sa pangalan ng Panginoon , ang Diyos ng Israel, na si Solomon na ating anak ang siyang papalit sa akin bilang hari.”

³¹Nagpatirapa agad si Batsheba, at sinabi, “Mabuhay kayo magpakailanman, Mahal na Haring David!”[#1:31 : O nang matagal.]

³²Sinabi ni Haring David, “Papuntahin dito ang paring si Sadoc, ang propetang si Natan at si Benaias na anak ni Jehoiada.” Kaya pumunta sila sa hari.

³³At sinabi ng hari sa kanila, “Pasakayin ninyo ang anak kong si Solomon sa aking mola at dalhin ninyo siya sa Gihon kasama ang aking mga pinuno.[#1:33 : Hayop na parang kabayo.]

³⁴Pagdating ninyo doon, papahiran ng paring si Sadoc at ng propetang si Natan ang ulo ni Solomon ng langis para ipakita na siya ang pinili kong maging hari ng Israel. Pagkatapos, patunugin nʼyo ang trumpeta at isigaw, ‘Mabuhay si Haring Solomon!’

³⁵Pagkatapos, samahan nʼyo siya pabalik dito, uupo siya sa aking trono at papalit sa akin bilang hari. Siya ang pinili ko na mamamahala sa buong Israel at Juda.”

³⁶Sumagot si Benaias na anak ni Jehoiada, “Gagawin po namin iyan! Mahal na Hari, nawaʼy ang Panginoon na inyong Diyos ang magpatunay nito.

³⁷Kung paano kayo sinamahan ng Panginoon , samahan din sana niya si Solomon at gawin niyang mas matagumpay pa ang paghahari niya kaysa sa inyong paghahari.”

³⁸Kaya lumakad na ang paring si Sadoc, ang propetang si Natan, si Benaias na anak ni Jehoiada, at ang mga Kereteo at Peleteo. Pinasakay nila si Solomon sa mola ni Haring David at dinala sa Gihon.[#1:38 : Sila ang mga guwardiya ng hari.]

³⁹Pagdating nila roon, kinuha ni Sadoc sa banal na tolda ang langis na nasa loob ng sisidlang sungay, at pinahiran niya si Solomon sa ulo. Pinatunog nila ang trumpeta at sumigaw silang lahat, “Mabuhay si Haring Solomon!”

⁴⁰Inihatid si Haring Solomon ng mga tao pauwi sa Jerusalem na nagkakasayahan at tumutugtog ng mga plauta. Nayanig ang lupa sa ingay nila.

⁴¹Narinig ito ni Adonias at ng kanyang mga bisita nang malapit na silang matapos sa kanilang handaan. Nang marinig ni Joab ang tunog ng trumpeta, nagtanong siya, “Ano ba ang nangyayari, bakit masyadong maingay sa lungsod?”

⁴²Habang nagsasalita siya, dumating si Jonatan na anak ng paring si Abiatar. Sinabi ni Adonias, “Pumasok ka dahil mabuti kang tao, at tiyak kong may dala kang magandang balita.”

⁴³Sumagot si Jonatan, “Hindi ito magandang balita, dahil ginawang hari ni Haring David si Solomon.

⁴⁴Pinapunta niya ito sa Gihon kasama ang paring si Sadoc, ang propetang si Natan, si Benaias na anak ni Jehoiada at ang kanyang mga personal na tagapagbantay na mga Kereteo at Peleteo. Pinasakay pa nila si Solomon sa mola ng hari.

⁴⁵Pagdating nila sa Gihon, pinahiran siya ng langis nina Sadoc at Natan para ipakitang siya ang piniling hari. Kababalik lang nila, kaya nga nagkakasayahan ang mga tao sa lungsod. Iyan ang mga ingay na inyong naririnig.

⁴⁶At ngayon, si Solomon na ang nakaupo sa trono bilang hari.

⁴⁷Pumunta rin kay Haring David ang mga pinuno niya para parangalan siya. Sinabi nila, ‘Gawin sana ng Diyos na mas tanyag si Solomon kaysa sa inyo, at gawin sana niyang mas matagumpay pa ang paghahari niya kaysa sa inyo.’ Yumukod agad si David sa kanyang higaan para sumamba sa Panginoon ,

⁴⁸at sinabi, ‘Purihin ang Panginoon , ang Diyos ng Israel, niloob niya na makita ko sa araw na ito ang papalit sa akin bilang hari.’ ”

⁴⁹Nang marinig ito ng mga bisita ni Adonias, tumayo silang takot na takot, at isa-isang umalis.

⁵⁰Natakot din si Adonias kay Solomon, kaya pumunta siya sa toldang sambahan at humawak sa mga sungay na bahagi ng altar.[#1:50 Ang sinumang hahawak sa parang mga sungay na bahagi ng altar ay hindi papatayin.]

⁵¹May nagsabi kay Haring Solomon, “Natakot sa inyo si Adonias, at ngayoʼy nakahawak siya sa mga sungay na bahagi ng altar. Hinihiling niya na sumumpa kayong hindi nʼyo siya papatayin.”

⁵²Sinabi ni Solomon, “Kung mananatili siyang tapat sa akin, hindi siya mapapahamak. Pero kung magtatraydor siya, mamamatay siya.”[#1:52 : Sa literal, wala ni kahit isang buhok niya na mahuhulog sa lupa.]

⁵³Pagkatapos, ipinakuha ni Haring Solomon si Adonias roon sa altar, at pagdating ni Adonias, yumukod siya kay Haring Solomon. Sinabi ni Solomon sa kanya, “Umuwi ka na.”