Hoseas 12

¹Umaasa ang Israel[#12:1 : Sa Hebreo, Efraim. Tingnan ang talababa sa 4:17.]

sa mga bagay na walang kabuluhan.

Maghapon niyang hinahabol

ang mga bagay na nagpapalala

sa kanilang kasinungalingan

at karahasan.

Nakikipagkasundo siya sa Asiria,

at nagpapadala sa Ehipto

ng langis ng olibo.

²May mga paratang ang Panginoon

laban kay Juda.

Parurusahan niya ang lahi ni Jacob

ayon sa kanilang mga asal;

gagantihan niya sila

ayon sa kanilang mga gawa.

³Noong si Jacob

ay nasa sinapupunan pa lamang,

nais na niyang lampasan

ang kanyang kakambal.

At noong lumaki na siya,

nakipagbuno siya sa Diyos.

⁴Oo, nakipagbuno siya

sa isang anghel,

at nagtagumpay siya.

Umiiyak siya habang nagmamakaawa

pagpalain siya ng anghel.

Nakita niya ang Diyos sa Betel,

at doon nakipag-usap

ang Diyos sa kanya.

⁵Siya ang Panginoong Diyos

ng mga Hukbo.

Panginoon ang kanyang pangalan.

⁶Kaya kayong mga lahi ni Jacob,

magbalik-loob na kayo sa Diyos

at ipakita ninyo ang pag-ibig

at katarungan.

At patuloy kayong magtiwala sa kanya.

⁷Mahilig mandaya

ang mga negosyante ninyo.

Gumagamit sila

ng mga timbangang may daya.

⁸Nagyayabang pa

kayong mga taga-Israel

at sinasabing,

“Nakapag-ipon kami ng kayamanan

at napakayaman

na namin ngayon.

Walang makapagsasabing yumaman kami

sa masamang paraan,

dahil kasalanan ang gawin iyon.”

⁹“Kaya ako,

ang Panginoon ninyong Diyos

na naglabas sa inyo sa Ehipto,

ay nagsasabi:

‘Patitirahin ko kayong muli sa mga kubol

katulad ng ginagawa ninyo

taon-taon sa Pista ng Kubol.’

¹⁰Nakipag-usap ako sa mga propeta

at binigyan ko sila

ng maraming pangitain.

Sa pamamagitan nila,

nagbabala ako sa inyo

na mapapahamak kayo.”

¹¹Ngunit ang mga taga-Gilead

ay nagpapatuloy

sa kanilang kasamaan,

at sila ay naging walang kabuluhan.

At ang mga taga-Gilgal naman

ay naghahandog ng mga toro

sa kanilang mga diyos-diyosan.

Kaya gigibain ang kanilang mga altar

at itoʼy magiging bunton ng mga bato

na kinuha sa inararong bukirin.

¹²Tumakas si Jacob

at pumunta sa Aram

at doon naglingkod

bilang pastol

upang magkaasawa.

¹³Sa pamamagitan ng propetang si Moises,

inilabas kayong mga Israelita sa Ehipto

at inalagaan ng Panginoon .

¹⁴Dahil marami kayong pinatay,

ginalit ninyo ako

na inyong Panginoon.

Kaya parurusahan ko kayo

at pagbabayarin sa paglapastangan

ninyo sa akin.