Job 28

Kung Saan Matatagpuan ang Karunungan

¹May mga minahan kung saan

matatagpuan ang pilak

at may mga lugar kung saan

dinadalisay ang ginto.

²Ang bakal ay nakukuha mula sa lupa,

at ang tanso ay tinutunaw mula sa mga bato.

³Gumagamit ng ilaw ang mga tao

upang madaig nila ang kadiliman

sa kanilang paghuhukay sa kailaliman ng lupa.

⁴Humuhukay sila ng daanan sa minahan,

sa dakong walang taong nakatira at dumadaan.

Bumababa sila sa pamamagitan

ng mga nakalaylay na lubid.

⁵Ang ibabaw ng lupa

ay tinutubuan ng pagkain,

ngunit ang ilalim nitoʼy

tinutunaw ng apoy.

⁶Ang mga bato doon ay may mga safiro[#28:6 : Isang uri ng mamahaling bato.]

at ang mga alikabok ay may ginto.

⁷Ang mga daan patungo roon

ay hindi makita ng mga ibon,

kahit ng ibong mandaragit.

⁸Hindi rin ito nadaanan

ng mga mababangis na hayop o ng leon.

⁹Hinuhukay ng mga tao

kahit na ang pinakamatigas na bato

sa ilalim ng bundok.

¹⁰Hinuhukay nila ang bundok

upang hanapin ang ibaʼt ibang uri

ng mamahaling bato.

¹¹Hinahanap din nila ang mga ito sa mga ilog.

¹²Ngunit saan nga ba matatagpuan

ang karunungan at pang-unawa?

¹³Hindi alam ng tao

kung saan ito matatagpuan.

Hindi ito matatagpuan dito sa lupa.

¹⁴Hindi rin ito matatagpuan

sa kailaliman ng dagat.

¹⁵Hindi rin ito nabibili

ng purong ginto o pilak.

¹⁶Ang halaga nito ay hindi matutumbasan

ng ginto mula sa Ofir

o ng alinmang mamahaling bato

gaya ng onise o safiro.

¹⁷Higit pa ito sa ginto o kristal.

Hindi ito maipagpapalit sa gintong alahas.

¹⁸Ang koral at haspe

ay walang sinabi,

ang halaga ng karunungan

ay higit pa kaysa rubi.

¹⁹Hindi ito mapapantayan

ng mamahaling batong topaz

na mula sa Etiopia

at hindi rin mababayaran ng purong ginto.

²⁰Saan ba nagmumula

ang karunungan?

Saan ang tahanan ng kaunawaan?

²¹Walang nilalang na makakakita nito

kahit sa mga ibon.

²²Kahit na ang lugar ng kapahamakan

na siyang lugar ng mga patay,

sabi-sabi lang ang kanilang nalaman

tungkol dito.

²³Diyos lang ang nakakaalam

kung saan matatagpuan ang karunungan.

²⁴Sapagkat nakikita niya

kahit ang pinakamalayong bahagi ng mundo

at ang lahat ng nasa ilalim ng langit.

²⁵Noong pinalakas niya ang hangin,

at sinukat kung gaano karaming ulan

ang dapat bumuhos,

²⁶itinakda na niya kung saan ito papatak,

at kung saan tatama ang kulog at kidlat.

²⁷Sa ganito niya ipinakita ang karunungan

at kahalagahan ng mga ito.

Nasubukan na niya ito at napatunayan.

²⁸Pagkatapos, sinabi niya sa mga tao,

“Ang pagkatakot sa Panginoon

at ang paglayo sa kasamaan

ay siyang karunungan at pagkaunawa.”