Job 32

Nagsalita si Elihu

¹Kinalaunan, tumigil na ang tatlong lalakeng ito sa pagsagot kay Job, dahil ipinipilit niya na wala siyang kasalanan.

²May isang tao roon na ang pangalan ay Elihu. Anak siya ni Baraquel na isang Buzita. Mula siya sa angkan ni Ram. Nagalit siya kay Job dahil sinisisi nito ang Diyos, sa halip na ang kanyang sarili.

³Nagalit din siya sa tatlong kaibigan ni Job dahil hindi nila napatunayang nagkasala si Job at lumalabas pa na ang Diyos ang may kasalanan.

⁴At dahil mas matanda sila kaysa kay Elihu, naghintay muna si Elihu na matapos silang magsalita bago siya nagsalita kay Job.

⁵Ngunit nang wala nang masabi ang tatlo, nagalit siya.

⁶Kaya sinabi ni Elihu na anak ni Baraquel na taga-Buzita,

“Bata pa ako at kayoʼy matatanda na,

kaya nag-aatubili akong magsalita.

Hindi ako nangahas na magsalita sa inyo

tungkol sa nalalaman ko.

⁷Ang akala ko ay kayo ang dapat magturo

dahil matatanda na kayo at maraming nalalaman.

⁸Ngunit ang totoo, ang espiritu

ng Makapangyarihan na nasa tao,

ang siyang nagbibigay ng pang-unawa.

⁹Ang katandaan ay hindi garantiya

ng karunungan at kaalaman

kung ano ang tama.

¹⁰“Kaya pakinggan ninyo ako.

Sasabihin ko ang nalalaman ko.

¹¹Naghintay ako habang iniisip ninyo

kung ano ang nararapat ninyong sabihin.

Pinakinggan ko ang inyong mga katuwiran.

¹²Pinakinggan kong mabuti ang mga sinabi ninyo,

ngunit ni isa sa inyoʼy walang nakapagpatunay

na nagkasala si Job;

ni hindi ninyo nasagot

ang mga pangangatwiran niya.

¹³Huwag ninyong sasabihing,

‘Napag-alaman naming

mas marunong siya.

Hayaan ninyong ang Diyos

ang sumagot sa kanya

at hindi ang tao!’

¹⁴Kung sa akin siya nakipagtalo,

hindi ko siya sasagutin

na katulad ng mga sinabi ninyo.

¹⁵“Hindi na kayo makakibo ngayon

at wala nang maisagot sa kanya.

¹⁶At ngayong wala na kayong maisagot,

kailangan ko pa bang maghintay?

¹⁷Ako rin ay may sasabihin ayon

sa nalalaman ko.

¹⁸Dahil marami akong gustong sabihin,

at hindi ko na talaga ito mapigilan.

¹⁹Para akong bagong sisidlang-balat

na punong-puno at malapit nang sumabog.

²⁰Kinakailangan kong magsalita

upang gumaan ang pakiramdam ko.

²¹Hindi ako papanig sa kahit kanino,

ni magbigay papuri sa sinumang tao,

²²sapagkat kung akoʼy mahusay mambola,

akoʼy tiyak na pupuksain ng aking Manlilikha.