Job 8

Ang Unang Sagot ni Bildad

¹Sumagot si Bildad na taga-Shua,

²“Hanggang kailan ka magsasalita

nang ganyan?

Nag-iingay ka lang

at walang kabuluhan

ang mga sinasabi mo.

³Hindi maaaring pilipitin

ng Diyos na Makapangyarihan

ang katarungan

o baluktutin ang katuwiran.

⁴Nagkasala ang iyong mga anak

laban sa Diyos

kaya nararapat lamang

ang natanggap nilang kaparusahan.

⁵Ngunit kung lalapit ka

sa Diyos na Makapangyarihan,

at magmamakaawa sa kanya,

⁶at mamumuhay nang malinis

at matuwid,

kahit ngayon ay agad ka niyang tutulungan

at ibabalik sa mabuting kalagayan.

⁷Bagamaʼt sa maliit ka nag-umpisa,

magiging masagana ang iyong hinaharap.

⁸“Tanungin mo ang mga matatanda.

Alamin mo kung ano ang natutunan

ng kanilang mga ninuno.

⁹Sapagkat parang kailan lang

tayo ipinanganak

at kaunti lang ang ating nalalaman,

at ang mga araw natin dito sa mundo

ay tulad ng aninong hindi nagtatagal.

¹⁰Pakinggan mo sila,

at sasabihin nila sa iyo

ang kanilang nalalaman.

¹¹Hindi mabubuhay ang halamang tubig

kung walang tubig.

¹²Habang silaʼy mura pa

at ʼdi pa namumukadkad,

silaʼy nalalantang mas mabilis pa

sa mga damo.

¹³Ganyan din ang kahihinatnan

ng lahat ng taong tumatalikod sa Diyos.

Ang kanyang pag-asa ay mawawala.

¹⁴Ang lahat ng inaasahan

at pinagtitiwalaan niya

ay kasinrupok ng sapot ng gagamba.

¹⁵Kapag sinandalan ito,

agad nalalagot;

dumidikit ngunit mahina ang kapit.

¹⁶Para siyang halamang sagana

sa dilig at sikat ng araw.

Yumayabong ito

sa buong hardin

¹⁷at kumakapit ang mga ugat nito

sa mga bato.

¹⁸Ngunit kapag nabunot na ito,

hindi na pinapansin.

¹⁹Ganyan ang wakas ng buhay niya,

at may tanim na tutubong muli

sa lugar na kanyang tinubuan.

²⁰“Ang totoo, hindi itinatakwil ng Diyos

ang taong matuwid

at hindi niya tinutulungan

ang taong masama.

²¹Patatawanin ka niyang muli,

at pasisigawin sa kagalakan.

²²Ipapahiya niya ang mga napopoot sa iyo

at wawasakin ang kanilang sambahayan.”