Salmo 122

Salmo 122

¹Ako ay nagalak ng sabihin nila sa akin,

“Pumunta tayo sa templo ng Panginoon .”

²At ngayoʼy narito na kami

at nakatayo sa pintuan ng Jerusalem.

³Ang Jerusalem ay bayan

na itinayong maganda at matibay.

⁴Dito pumupunta ang mga lahi ng Israel

upang purihin ang Panginoon

ng naaayon sa kanyang itinuro sa kanila.

⁵Dito sa Jerusalem ang hukuman ng mga hari

na mula sa angkan ni David.

⁶Idalangin ninyo na maging mabuti ang kalagayan ng Jerusalem:

“Umunlad sana ang nagmamahal sa bayan na ito.

⁷Magkaroon sana ng kapayapaan sa loob ng Jerusalem

at kaunlaran sa palasyo nito.”

⁸Alang-alang sa aking mga kamag-anak

at mga kaibigan, sasabihin ko sa Jerusalem,

“Sumainyo ang kapayapaan.”

⁹Alang-alang sa templo ng Panginoon na ating Diyos,

mananalangin ako para sa kabutihan

at kaunlaran ng Jerusalem.