Salmo 16

Salmo 16

¹O Diyos, ingatan nʼyo po ako,

dahil sa inyo ako nanganganlong.

²Sinabi ko sa Panginoon ,

“Kayo ang aking Panginoon .

Lahat ng kabutihang nakamtan ko

ay mula sa inyo.”

³Tungkol naman sa mga taong banal

na nasa lupaing ito,

lubos ko silang kinalulugdan.

⁴Ngunit ang mga piniling sumamba

sa mga diyos-diyosan

ay lalong mahihirapan.

Hindi ako sasáma sa paghahandog nila ng dugo

sa kanilang mga diyos-diyosan,

at ayaw kong banggitin man lang

ang pangalan ng mga ito.

⁵Panginoon , kayo ang lahat sa aking buhay.

Lahat ng pangangailangan koʼy inyong ibinibigay.

Kinabukasan koʼy nasa inyong mga kamay.

⁶Ang mga biyayang kaloob nʼyo sa akin

ay parang kaaya-ayang taniman.

Tunay na napakaganda

ng pamana nʼyo sa akin.

⁷Pupurihin ko kayo, Panginoon , na sa akin ay nagpapayo.

At kahit sa gabiʼy pinaaalalahanan ako ng aking budhi.

⁸Panginoon palagi ko kayong iniisip,

at dahil kayo ay lagi kong kasama, hindi ako matitinag.

⁹Kayaʼt nagagalak ang aking puso,

at akoʼy panatag, dahil alam kong ligtas ako.

¹⁰Sapagkat hindi ninyo pababayaan

na mapunta ako sa lugar ng mga patay;

hindi nʼyo hahayaang mabulok sa libingan

ang matapat ninyong lingkod.

¹¹Itinuro ninyo sa akin ang landas

patungo sa buháy

na puno ng kasiyahan,

at sa piling nʼyo, aking matatagpuan

ang ligayang walang hanggan.